Javi Martinezen izena duten zale taldeek izena aldatuko dute

Javi Martinezen izena duten zale taldeek izena aldatzea erabaki dute. Bayern Municheko jokalariaren azken ekintzak dira erabaki horren zergatia.

Javi Martinez aferaren azken "kapitulua" larunbatean izan zen. Iragan larunbateko goizaldean Lezaman baimenik gabe sartu zela ziurtatu zuen Athleticek. Antza denez, kirol instalazioak inguratzen dituen hesitik gora salto egin zuen erdilariak.

Talde zuri-gorriko iturriek jakitera eman zutenez, segurtasun enpresak gertakari baten berri eman zuen iragan larunbatean. "Gizon batek Lezamako kanpoko hesia salto egin" zuen 00:15 aldera. Zaindariak ezezaguna harrapatu zuen.

Harrapatuta zegoela ikusirik, gizonezkoa Javi Martinez gisa identifikatu zen, Athleticek azaldu zuenez. Bere gauzak hartzera joan zela jakinarazi zion jokalariak zaindariari.
Javi Martinezen azalpenak entzun eta sartzeko baimena eman zion zaindariak, iturriek zehaztu zutenez.

Gainera, oraindik ere Athleticeko jokalaria zenean, klubaren baimenik gabe bidaiatu zuen nafarrak Munichera, bertan Bayernekin azterketa medikoa gainditzeko.