Athletic Club
Mediku txostena
Nico Williamsek lesioa du izterrean, eta zalantzan dago Kopan Atleticoren aurka parte hartuko duen
EITB Media
Athleticeko jokalariak min hartuta amaitu du Mallorcaren kontrako Ligako partida. Klubak jakinarazi du Nicok lesioa duela eskuin izterreko gihar aduktorean. Iñaki Williamsek, berriz, min zehaztugabea du ezker oinean.
-
Nico Williams, Athleticeko jokalaria. Argazkia: EITB Media
Nico Williams zalantzan dago Athleticek Atletico Madrilen aurka otsailaren 7an Civitas Metropolitano estadioan jokatuko duen Errege Kopako finalerdietako joaneko partidarako.
Ostiralean, otsailaren 2an, talde zuri-gorriko jokalariak min hartu zuen Mallorcaren kontrako (4-0) Ligako neurketan. Nicok San Mameseko berdegunea utzi behar izan zuen, lesionatuta. Hala, bada, Athleticek honako hau jakinarazi du: "Nico Williamsek lesioa du eskuin izterreko gihar aduktorean".
Bilboko klubaren mediku-txostenaren arabera, Iñaki Williamsek "min zehaztugabea" du ezker oinean. Horrez gain, bi jokalariak lesioen bilakaeren zain daudela adierazi du Athleticek.
