Zurien eraginkortasunak Athleticen gogoa apaldu du

Fitxa teknikoa:

Athletic: Iraizoz; Javi Martinez, Ekiza, San Jose (Iraola, 46. minutua), Aurtenetxe; Iñigo Perez, De Marcos, Muniain; Susaeta, Ibai Gomez eta Llorente.

Real Madril: Casillas; Arbeloa, Pepe, Sergio Ramos, Coentrao; Khedira, Xabi Alonso; Callejon (Marcelo, 86. minutua), Ozil (Granero, 78. minutua), Cristiano Ronaldo; eta Higuain (Benzema, 76. minutua).

Golak: 0-1, 15. minutua: Higuain. 0-2, 20. minutua: Ozil. 0-3, 50. minutua: Cristiano Ronaldo.

Real Madrilek Liga matematikoki irabazi du gaur San Mamesen. Zuriek Athletic 0-3 mendean hartu dute Bilbon. Denboraldiko beste partida garrantzitsu batzuetan erakutsitako maila ez dute azaldu bizkaitarrek eta Real Madrilek ez du barkatu.

Lehen zatia erritmo biziarekin hasi da. Real Madrilek kontraerasora azkar ateratzeko planteatu du neurketa eta ongi atera zaio. Horrela, talde zuria Iraizozen atera arriskuarekin hurbildu da hasieratik, eta penalti bat topatu du lehen minutuetan. Javi Martinezek baloia eskuarekin ukitu eta epaileak ez du zalantzarik izan, penaltia adierazi du. Baina Iraizozek jaurtiketa gelditu dio Ronaldori.

Hala ere, alaitasunak gutxi iraun du San Mamesen, izan ere, Mourinhoren mutilek aurrea hartu dute markagailuan minutu gutxi geroago. Higuainek lehen gola sartu du zurien jokaldi on baten ostean. Bilbotarrak saiatu dira, baina bigarren kolpea jaso dute kontraeraso azkar batean. Ozilek bigarren gola sartu du.

Athleticek saiatzen jarraitu du eta epaileak ez du Khedirak egindako penalti argia adierazi. Bizkaitarrek abagune bikoitza izan dute minutu gutxi geroago. Iñigo Perezen jaurtiketa bikaina Casillasek aldaratu du eta ondorengo zartakoak langan jo du.

Atsedenaldiaren ostean, Higuain gola sartzeko zorian izan da bi aldiz, baina Javi Martinez ederki aritu da defentsa lanetan. Hirugarren abagunean ez dute barkatu zuriek. Xabi Alonsok korner bat atera eta Cristianok buruz sareetan kokatu du baloia.

Aldea murrizteko pare bat saiakera egin ditu Athleticek. De Marcosen jaurtiketa batek langan jo du. Baina Javi Martinezi bigarren txartel horia atera dio epaileak eta bizkaitarrak gizon bat gutxiagorekin geratu dira.