Athletic-Albacete (4-0): Caparros dute zain final-laurdenetan

Athleticek distirarekin Errege Kopako final-laurdenetarako txartela lortu du San Mamesen. Albacete duin bat kanporatu dute zuri-gorriek. Bielsaren jokalariek abagune ugari izan dituzte eta eskandaluzko emaitza lortu ahal izan dute, baina zuri-gorriek kale egin dute errematean.

Norgehiagokaren hasieratik Athleticek jokoaren kontrola bereganatu du eta gola egiteko aukera dexente izan ditu. Hirugarren minutuan Llorentek gola sartzeko abagune garbia izan du, baina Camposen aurrean bakarrik zegoenean huts egin eta errematea kanpora bidali du.

Zuri-gorriek neurketa kontrolatu eta aukera gehiago izan dituzte aurreneko gola sartu aurretik. Bien bitartean, Albacete kontraerasoan saiatu da eta Bielsarenen baloi irteera oztopatu nahi izan dute presioa goian eginez.

Zuri-gorrien aurreneko gola Muniainen jokaldi paregabe batean etorri da. Susaetak nafarraren pase zoragarri bat aprobetxatu du Albaceteko atezaina buruz gain gainditzeko.

Gola sartu eta gero, talde bizkaitarrak sakatzen jarraitu du, baina kamuts aritu da azken metroetan. Bestalde, Mikel Santamaria zuri-gorri ohiak berdegunea utzi behar izan du lesionaturik.

Bigarren zatiak lerro beretik jarraitu du, baina aurreneko zatian gertatu ez bezala, Bielsaren mutilek abagune gehiago aprobetxatu dituzte. Horrela, Herrerak gol ikaragarria sartu du jokaldi on bati amaiera emanez. Lehen erremate bat aldaratu du Albaceteko atezainak, baina bigarrenaren aurrean ezin izan du ezer egin, izan ere, eskuadratik sartu da.

Hamar mintu geroago Toquerok hirugarrena egin du orpoz eta San Josek markagailua itxi du burukada baten bidez laugarrena sartu baitu. Gol gehiago sartzeko aukerak izan ditu Athleticek, baina Bielsaren jokalariek ez dute asmatu.

Fitxa teknikoa:

Athletic: Iraizoz; Iraola, San Jose, Javi Martinez (Ekiza, 78. minutua), Aurtenetxe; Iturraspe, Herrera (Iñigo Perez, 79. minutua), De Marcos; Susaeta, Muniain eta Llorente (Toquero, 65. minutua).

Albacete: Campos; Alba, Santamaria (Herreros, 33. minutua), Castillo, Zurdo; Tete, Candela, Rocha, Adria, Torres (Victor Curto, 54. minutua; Miguel Nuñez, 64. mintua) eta Calle.

Golak: 1-0, 24. minutua: Susaeta. 2-0, 64. minutua: Herrera. 3-0, 77. minutua: Toquero. 4-0, 85. minutua: San Jose.