Hannover edo Legia Varsovia izan litezke Athleticen aurkariak

Alemaniako Hannover eta Poloniako Legia Varsovia  Athleticen aurkariak izan litezke Europa Leagueko final-hamaseirenetan. Zuri-gorriek F multzoko lehen postua ziurtatu zuten ostegunean Slovan Bratislava 2-1 mendean hartuta.

Athleticek multzoko fasean bigarren postuan sailkatu den talde bat izango du aurkari hurrengo kanporaketan edo Txapeldunen Ligan hirugarren postuan sailkatu direnetako bat.

Txapelketa horien multzoen fasea bukatzeko jardunaldi bat falta denean, Hannoverrek eta Legiak ziurtatuta dute dagoeneko euren multzoetako bigarren postua. Bielsaren taldeak ezin ditu Atletico Madrilen aurka indarrak neurtu.

Hannoverrek 2-0 galdu zuen Belgikan Standard Liejaren kontra eta Legiak gol-zaparrada jaso zuen etxean PSV Eindhovenen aurka (0-3).