Athleticeko lagunarte zuri-gorria sortu dute Alabaman

Alabama estatuan (AEB) bizi diren Athletic Club taldeko jarraitzaile batzuk 'Sweet Home Athletic de Bilbao' izeneko lagunartea sortu berri dute, AEBetako hegoaldean zehar talde zuri-gorriarekiko zaletasuna sustatzeko asmoz. Lagunarte estatubatuarraren izenak Lynyrd Skynyrd taldearen "Sweet Home Alabama" abestiari aipu egiten dio.

"Beste estatu batzuetan bazkideak lortzeko gizarte eta kirol arloko ekitaldiak antolatzea da asmoa", adierazi dute lagunarte berriko kideek prentsa ohar baten bidez.

Halaber, estatubatuarren arreta erakarri nahi dute Athletic bezalako kirol erakunde batekiko, talde zuri-gorriaren balioak nahiko antzekoak baitituzte. Antzekotasun hori unibertsitateko futbol amerikarreko taldeek duten babes handian ikusten da, hegoaldeko estatu askotan futbol profesionaleko taldeek dutena baino askoz handiagoa baita.

"Unibertsitateko futbol amerikarra jokatzeagatik dirurik jasotzen ez duten tokiko ikasleek osatzen dute. 100.000tik gora ikusleko estadioak dituzte eta astero bete egiten dira aurkakoa zein den eta eguraldia nolakoa den kontuan izan gabe", azaldu dute.

"Unibertsitateko 'soccer' jokoak (futbol europarra aipatzeko AEBetan erabiltzen duten izena) AEBetan futbol amerikar unibertsitarioak izan duen arrakasta izatea lortuko bagenu, ziur gaude Europan egungo futbol profesionalaren eredu ekonomikoa zalantzan jarriko litzatekela", adierazi dute 'Sweet Home Athletic de Bilbao' lagunarteko sortzaileek.