Aduriz: 'Ezin dugu hanka-sartzerik izan, hori ordaindu egiten delako'

Aritz Adurizek taldekide guztiak ohartarazi ditu gaur Bukaresteko Dinamoren aurka jokatuko duten partidak duen arriskuaren inguruan. Athleticeko aurrelariak esan duenez, ezin dute "hanka-sartzerik" izan, Europan neurketak "oso orekatuak" izaten direlako eta "okerrak ordaindu egiten direlako".

Jokalari zuri-gorriak ez daki Athleticen inguruan konfiantza gehiegi dagoen ala ez, joaneko partidan bana egin ostean, baina, esan duenez, aldagela barruan "errespetu handia" diote Cosmin Contrak zuzentzen duen taldeari.

"Ez dut kaleko giroa asko dastatu, baina aldagela barruan errespetu handia diogu aurkariari. Neurketa guztiak zailak dira, eta askotan xehetasun txiki batek erabakitzen ditu, ezin dugu hanka-sartzerik egin, gero hori ordaindu egiten delako. Dinamo oso kontuan izateko aurkaria da, eta gauzak oso ondo egin behar ditugu kanporaketa gainditzeko", azaldu du.

Donostiarrak esan du ez dakiela Dinamok zein asmo izango duen, bere zelaian itxarongo duen, joaneko partidako lehen zatian bezala, ala erasora jokatuko duen, bigarren zatian egin zuten bezala, baina Athleticek "neurketa menderatu" behar duela adierazi du.