Caparros: "Lehenengo egunean baino ilusio handiagoa dut"

Athleticekin denboraldi baterako kontratua berritu duela ofizialki iragarri duen ekitaldian, 2007an Bilbora heldu zen "lehenengo egunean baino ilusio handiagoa" duela esan du gaur Joaquin Caparrosek.

"Europako talde garrantzitsu bateko aulkian hiru urte igaro ahal izateagatik" eskerrak eman dizkio Caparrosek Athletici, atzetik "historia handia" duen taldea delako. "Talde lehiakorra" egin izanagatik eta denboraldi bakoitzean helburuak betetzeagatik zoriondu da Utrerako entrenatzailea.

FC Bartzelonaren kontra iragan denboraldian "jokatutako Errege Kopako finala irabazi ez izana" deitoratu du Caparrosek. "Finalak irabazteko dira eta irabazi izan bagenu, Valentziatik itzultzean, ongi-etorria biderkatuko zatekeen", Bilbon eta Bizkaian izandako mobilizazio soziala gogorarazi du Athleticeko entrenatzaileak.

Prentsaurrekoa eskaini dute Garcia Macua presidenteak eta Caparrosek berak Ibaiganen eta bertan teknikariaren kontratu berritzearen berri eman dute.

Laugarren denboraldia emango du hurrengo urtean Utrerakoak Bilboko taldean. 2007an heldu zen presidente berria zen Macuaren eskutik.