Iraizoz eta hamar gehiago, Betisi aurre egiteko

Athleticek Betis hartuko du San Mames estadio berrian, ostegunean, 20:00etan. Sevillako taldea aurkari arriskutsua izan da Bizkaiko taldearentzat, San Mamesen batez ere, azkenengo denboraldietan. Zuri-gorriek azkenengo hamabost neurketetatik lau soilik irabazi dituzte Betisen kontra etxean (sei berdinketa eta bost porrot). Hala ere, Valverderen gizonek garaitu gabe jarraitu nahi dute estadio berrian.

Zuri-gorriek porrot mingarria jaso zuten Espanyolen aurka, eta Betisen kontra ilusioa berreskuratzeko aukera paregabea izango dute. Pepe Melen taldeak sendotasuna erakutsi du aurreneko jardunaldietan, baina Athleticek hiru puntuak eskuratzeko guztia emango du, zaleen aurrean. Beñat Etxebarria bizkaitarrak taldekide ohien aurka jokatuko du, aurrenekoz.

Iraizozek eta Iturraspek hasieratik jokatuko dutela dirudi, baina Mikel Rico eta Oscar De Marcosen ordez Ander Herrerak eta Markel Susaetak jokatuko dute. Baliteke Valverdek beste aldaketaren bat ere egitea.

Sevillako taldean, Ruben Castro golegile nagusia, Juan Carlos eta Eder Vilarchao deialditik at gelditu dira, lesionatuta baitaude.

Ustezko hamaikakoak:

Athletic: Iraizoz; Iraola, Gurpegui, San Jose, Laporte; Iturraspe, Beñat, Herrera; Susaeta, Aduriz eta Muniain.

Betis: Sara; Chica, Amaya, Paulao, Nacho; Matilla, Xavi, Verdu; Juanfran, Molina eta Cedric.