Adurizek berriro erabaki du Athleticen alde

Athleticek hiru puntu garrantzitsu lortu ditu Mallorcan (0-1) Aritz Adurizek lehenengo zatiko 10. minutuan eskuratutako golari esker. Zuri-gorriek 0-1ekoari esuteko asko sufritu dute defentsan, eta Gorka Iraizozek gelditu erabakigarriak egin behar izan ditu.

Gorka Iraizoz eta Aritz Aduriz izan dira aurreneko zatiko protagonista nagusiak. Gipuzkoako aurrelariak zuri-gorrien gola eskuratu du, eta Nafarroako atezainak sei gelditu erabakigarri egin ditu. Athleticen gola norgehiagokako 10. minutuan heldu da. Adurizek Iraolaren errematea ederki aprobetxatu du, eta burukada indartsu batekin Aouate gainditu du (0-1).

Marcelo Bielsaren taldeak atzerapauso nabarmena eman du 0-1ekoarekin, eta Caparrosen mutilak erasoan murgildu dira. Hala ere, Gorka Iraizozek bi gelditu ikusgarri egin ditu Giovaniren eta Victorren saiakerak desbideratzeko. Hemedek ere abagune ederra izan du, 34. minutuan, baina nafarrak beste gelditu erabakigarri bat egin behar du. Atsedenaldia heldu aurretik Adurizek bigarrena lortzeko aukera polita izan du, baina bere jaurtiketa zutoin ondotik kanpora joan da.

Bigarren zatiko aurreneko minutuetan Joaquin Caparrosen mutilek gola eskuratzeko beste abagune oso argi bat izan dute, baina Victorrek baloia kanpora bidali du. Pixkanaka, Athleticek partidaren kontrola hartu du, baina zuri-gorriek ez dituzte aukerak sortu. Bielsaren taldearen abagune argiena Aritz Adurizek izan du, 69. minutuan, baina Aouatek ederki desbideratu du donostiarraren errematea.

Mallorcak erasoko postuetan jokalari asko bildu ditu, eta Athleticek defentsa sendotu du. Zuri-gorriek atzean asko sufritzen jarraitu dute, baina baloiren jabetza ondo kontrolatu dute, eta Bilboko taldeak hiru puntuak eskuratu ditu

Fitxa teknikoa:

0 - Mallorca: Aouate; Nsue, Nunes, Geromel, Bigas; Arizmendi (Alfaro, 85. minutua), Marquez (Marti, 73. minutua), Pina, Dos Santos (Brandon, 73. minutua); Victor eta Hemed.

1 - Athletic Club: Iraizoz, Ekiza, Iraola, Laporte, Aurtenetxe; Susaeta (Ibaiz Gomez, 63. minutua), San Jose, De Marcos (Gurpegui, 78. minutua), Ander Herrera; Muniaín (Toquero, 87. minutua) eta Aduriz.

Golak: 0-1, 10. minutua: Aduriz