Querejeta: 'Abelardok ez du jarraituko, irabazten duenaren bikoitza eskatu du'

Josean Querejeta Alaveseko akziodun nagusiak, baieztatu egin du Abelardo Fernandezek ez duela Arabako taldeko entrenatzailea izaten jarraituko datorren denboraldian. Onda Cero kateari eskainitako elkarrizketa baten egin du baieztapena.

"Harrituta" azaldu da Querejeta, albistea publiko egin delako. "Albiste hau Abelardoren ordezkariak, Abelardok, kirol-zuzendariak eta nik bakarrik genekien". Zentzu horretan, teknikari asturiarraren inguruko jendeari bota dio filtrazioaren errua.

"Abelardok denboraldi honetan irabazten ari denaren bikoitza irabaztea eskatu zuen kontratua berritzeko, eta Sergio Fernandez kirol-zuzendariari esan zion ez zuela jarraitu nahi, Alavesekin ezingo baitu lortu aurten lortutakoa baino gehiago", esan du Baskonia Alaves taldeko presidenteak.

Gainera, Josean Querejetak adierazi du, Alavesek egin duen Ligako bigarren itzulia ez dela ona izan, eta ilusioa zeukatela Europarako postu bat lortzeko.