Beste kirolak

Emakumezkoen 1. finalerdia

Ibiurrek, emozioz betetako finalaurrekoan, Ergobia menderatu du, eta "Harri Herri" saioaren final handian da

EITB MEDIA

Publikatuta: 2025/03/31 23:24 (UTC+2) Azken eguneratzea: 2025/04/01 00:08 (UTC+2)

Harri baldarraren lehian, Lur Errekondo kapitain duen taldeak bi jasoaldiz gainditu du, 31-29, Karmele Gisasola kapitain duen taldea. Horrenbestez, Ibiurrek "Harri Herri" saioko finalerako txartela eskuratu du; apirilaren 27an ikusi ahalko dugu final handi hori.

5:29

• Whatsapp
• Whatsapp
• telegram
• twitt
• Bidali
• Esteka kopiatu

Ibiur taldea 2025eko "Harri Herri" saioko final handirako sailkatu da; izan ere, EITBk astelehenean emandako emakumezkoen lehen finalerdian, Ergobia menderatu du. Harri baldarrekin egindako azken lehian, Ibiurreko Ainitze Zumetak eta Sara Jimenez de Aberasturik 31 jasoaldi egin dituzte, eta Ergobiako Lierni Osak eta Olaia Esnaolak, ordea, 29. Hala, Lur Errekondo kapitain duen taldeak Karmele Gisasola kapitain duena gainditu du, eta apirilaren 27an ikusgai izango den finalerako sailkatzea bereganatu.

Harri landuekin, oso parean ibili dira bi taldeak. Karmele Gisasolak irabazi du zozketa, eta zehaztu du harri-jasotzaile bakoitzak izango zituela hiru minutu errektangularrerako, bi minutu kubikorako, denbora hori bera zilindrorako, eta minutu bat bolarako. 100 kiloko errektangularrerako, Ibiurrek Aroa Sanchez izan du ordezkari, eta horrek zortzi jasoaldi egin ditu, Ergobiako Patricia Martinek beste. 63 kiloko kubikoarekin, Ergobiako Olaia Esnaolak 18 jasoaldi erdietsi ditu, eta Ibiurreko aurkariak, Ainitze Zumetak, bat gehiago, 19.

63 kiloko zilindro zaharrarekin, berdinketa izan da berriro: Ergobiako Lierni Osak eta Ibiurreko Sara Jimenez de Aberasturik 25na jasoaldi egin dituzte. Eta 50 kiloko bolari dagokionez, Ibiur jasoaldi batez gailendu zaio Ergobiari, Leire Oleak 17 egin baititu, eta Udane Ostolazak 16.

5:29

Horrela lortu du Ibiurrek garaipena, ''Harri Herri'' saioan, Ergobiaren aurkako finalaurrekoan

Harri baldarraren lehiarako, Karmele Gisasola Ergobiako kapitainak Lierni Osa eta Sara Jimenez de Aberasturi hautatu ditu, eta horiek bost minutu eta 37 segundo izan dituzte lanean aritzeko; Lur Errekondok, aldiz, Ainitze Zumeta eta Sara Jimenez de Aberasturi aukeratu ditu, eta Ibiurrek bost minutu eta 45 segundo izan ditu. Lehia ikusgarria izan da, zirraragarria, lau harri-jasotzaileek lan bikaina egin dutelako. Azkenean, Ibiur nagusitu da, bi jasoaldi gehiago eginda, 31-29.

Apirilaren 14an izango da ikusgai "Harri Herri" saioko emakumezkoen bigarren finalaurrekoa, eta Ulia eta Mollarri arituko dira horretan, nor baino nor gehiago, finalerako txartela eskuratzea helburu. Aurretik, datorren astelehenean, apirilaren 7an, Etxauri eta Albizuri ahaleginduko dira garaipena lortzen, gizonezkoen lehenengo finalerdian. 

Puntuazioa: KOADROA (10 segundo jasoaldiko), KUBIKOA (5 segundo jasoaldiko), ZILINDROA (3 segundo jasoaldiko) eta BOLA (3 segundo jasoaldiko).