Beatrice Chebetek 19 segundoan ondu du 5 kilometroko munduko errekorra

Beatrice Chebet kenyarrak, 2024ko Parisko Olinpiar Jokoetan 5.000 eta 10.000 metroko probetan txapeldun olinpikoa izandakoak, berea zen 5 kilometroko munduko errekorra 19 segundoan ontzea lortu du astearte honetan, Bartzelonan jokatu den Cursa dels Nassos lasterketan.

Hala, 13:54an ezarri du marka berria, 14:13ko iazko denbora txiki utzita. Horrenbestez, Chebetek nagusitasunez defendatu du lasterketa berean joan zen urtean eskuratutako garaipena.

Gainera, 24 urteko atleta afrikarra, distantzia horretan hamalau minutuko langatik jaisteko gai izan den historiako lehen emakumea da.

Krosean ere munduko txapelduna den atleta, besteak beste, Elgoibarko krosean (Juan Muguerza Memoriala) gailendu zen urte hasieran, eta, hain zuzen ere, aipatu lasterketaren edizio berri bat jokatuko da igande honetan, ETB1en eta eitb.eus-en zuzenean ikusgai egongo dena, 12:30etik aurrera.