Beste kirolak
Errugbia
Hegoafrikak laugarren aldiz irabazi du Munduko Errugbi Txapelketa, bigarrenez jarraian
AGENTZIAK | EITB MEDIA
Pollard jaurtitzaileak gidatuta, afrikarrak 11-12 nagusitu dira Zeelanda Berriaren aurka, Munduko Txapelketa laugarren aldiz eskuratzeko.
-
Hegoafrikako jokalariak 2023ko Munduko Txapelketako koparekin. Argazkia: EFE
Hegoafrikako errugbi selekzioak 11-12 irabazi dio larunbat honetan Zeelanda Berriari, Frantzian jokatu den Munduko Kopako final handian, eta bere historian laugarren aldiz irabazi du titulua.
Shannon Frizell zeelandaberritarrari atera dioten txartel hori goiztiarrak argi utzi du partida gogorra, trabatua eta tentsioz betea izango zela. Zeelanda Berrikoak gizon bat gutxiagorekin geratu dira, ordu erdia bete baino lehen Sam Cane kapitaina kanporatu ondoren, txartel gorria aterata.
Ordura arte, Hegoafrikako taldea 3-9 zen aurretik, Pollardek gauzatutako hiru zigor-kolperi esker. Beste bat gehitu dute berehala (3-12), eta Zeelanda Berriak erantzun bera eman dio Richie Mo'ungak bigarren zigor-kolpea bihurtuta. 6-12 horrekin iritsi dira atsedenaldira.
Hala ere, Zeelanda Berriak saiatzen jarraitu du, eta saria aurkitu du 58. minutuan, Beauden Barretten entsegu batekin. Mo'ungak huts egin du ondorengo jokaldian, eta Jordie Barrettek ere huts egin du zigor-kolpe batean, 74. minutuan. Bere taldeak partida iraultzeko aukerak bertan behera geratu dira horrela.
Ingalaterrak Argentina gainditu eta brontzea eskuratu du (23-26)
Ingalaterrak Munduko Errugbi Kopako brontzezko domina eskuratu zuen ostiralean, Argentina 23-26 menderatuta, hegoamerikarrek luzapena behartzeko aukera izan zuen partida batean.
Nicolas Sanchezek 75. minutuan huts egin zuen partida berdinduko zukeen zigor-kolpea, azken minutu zirraragarrietan.
