Beste kirolak
ERREFERENTEAK SORTZEKO
Geldiezinak, euskal emakume kirolari onenen lana nabarmentzeko proiektua
EITB MEDIA
Ekimenak euskal kirolaren historian nabarmendu diren hainbat emakumeren lana eta lorpenak balioesten ditu, belaunaldi berrientzako erreferenteak sortzeko helburuarekin.
Geldiezinak-Imparables proiektua aurkeztu dute asteazken honetan Bilboko EITBren egoitzako Multibox aretoan. Eusko Jaurlaritzako Jarduera Fisikoaren eta Kirolaren Zuzendaritzak eta Basque Team Fundazioak abiatutako ekimena da, eta euskal kirolaren historian nabarmendu diren hainbat emakumeren lana eta lorpenak balioesten ditu, belaunaldi berrientzako erreferenteak sortzeko helburuarekin.
Hala, xede horiek erdiesteko asmoz, besteak beste, Korima Filmsek ekoitzitako Geldiezinak dokumental saila astero egongo da ikusgai ETB1en, igandetan, 11:30ean, "Helmuga" saioaren barruan. Gainera, formatu elebidunean eskainiko da, azpitituluekin, Basque Team Fundazioaren gainerako kanaletan (youtube, webgunea eta sare sozialak) eta EiTBko Primeran plataforman. Hala, Ibone Belaustegigoitia, Olinpiar Joko batzuetan lehiatu den lehen emakume euskalduna, Maialen Chourraut (hiru domina olinpiko lortu ditu), Maider Unda, Ainhoa Ibarra, Ainhoa Murua, Eli Pinedo, Almudena Cid, Leire Olaberria, Maider Telleria eta Sara Carracelas olinpiar kirolariak, Edurne Pasaban alpinista eta Karmele Gisasola, Nerea Arruti eta Alazne Etxaburu herri kiroletako izarrak, izango dira, besteak beste, protagonistak.
Atalez atal, emakumeen kirol-unibertsoaren berezitasunak ulertzen lagunduko duten gai interesgarriak landuko dituzte; amatasuna, estereotipoen haustura, plangintza espezifikoen beharra emakumearen fisiologia kontuan hartuta eta kirol-erakundeetako erabaki-postuetan emakumeen presentzia bultzatzeko beharra, besteak beste.
Dokumentalekin batera podcast sorta bat ere egin da, gai eta protagonista berberekin, eta bakoitzak 20 minutuko iraupena izango du. Horiek EiTB taldeko plataformen bidez entzun ahal izango dira.
Haurtzarora bideratuta, 6 eta 11 urte bitarteko haurrei zuzendutako ipuin eta fitxa didaktikoen bilduma bat ere egin dute, aipatutako protagonistekin, landutako gaiak publikoaren adinera egokituta. Euskal Autonomia Erkidegoko lehen hezkuntzako ikastetxe guztietan banatuko dira, baina bertsio digitalak Basque Teameko webgunetik eta fundazioaren gainerako euskarrietatik eskuratu ahal izango dira. Ipuinak eta fitxak Paul Caballerok eta Ane Undurragak sortu dituzte.
Aurkezpena
Kimua Dantza Kolektiboaren GenErorAntz obraren pasarte batekin eman zaio hasiera ekitaldiari, eta bertan izan dira, besteak beste, Bakartxo Tejeria Eusko Legebiltzarreko presidentea, Bingen Zupiria Kultura eta Hizkuntza Politikako sailburua, Gorka Iturriaga Jarduera Fisiko eta Kirol zuzendaria, Olatz Legarza Basque Team Fundazioko koordinatzailea, Joseba Urkiola EiTB Mediako kirol zuzendaria, eta Emakundeko zuzendaria den Miren Elgarresta.
Bereziki hunkigarria izan da Ibone Belaustegigoitia ohol-jauzilari ohiaren, olinpikoa izan zen lehen euskal emakumearen, presentzia, bere ahizpa Bibiñerekin batera joan dena, baita Maialen Chourraut piraguistarena, Maider Unda borrokalari ohiarena, Ainhoa Ibarra eskiatzaile ohiarena, Maider Telleria eta Teresa Motos belar-hockey jokalari ohiena, Ainhoa Ostolazala txirrindulari ohiarena eta Alazne Etxaburua, Nerea Arruti zein Karmele Gisasola herri kiroletako izarrena ere, bestak beste. Almudena Cid gimnastak eta Edurne Pasaban alpinistak, lan-kontuak direla eta bertaratu ezin izan diren arren, aretoko pantaila erraldoian proiektatutako agurra bidali dute.
Europar Batasuneko Next Generation laguntzei esker diruz lagundutako "Berreskuratze, Eraldaketa eta Erresilientzia Plana"ren bitartez, Eusko Jaurlaritzak gizartea aberastuko duten ereduak sortu nahi izan ditu, batez ere, goi-mailako euskal kirolari onenetako batzuen iragana, oraina eta, kasu batzuetan, etorkizuna ikusaraziz.
