Beste kirolak
Ostegunetik larunbatera
Bilbon jokatuko da aste honetan Red Bull Cliff Diving jauzien txapelketa
Agentziak | Erredakzioa
Ostegunean munduko jauzilari onenak ikusi ahal izango dira berriro Salbeko zubitik salto ikusgarriak egiten. Aurten, emakumeen jauziak ere izango dira ikusgai.
-
Bilbao volverá a acoger la competición de clavadistas
2019ko Red Bull Cliff Diving txapelketa Bilbora bueltatuko da aste honetan, hilaren ostegunetik larunbatera, eta, gizonezkoen jauziez gain, aurtengo ekitaldian emakumeen jauziak ere ikusi ahal izango dira.
Horrenbestez, munduko jauzilari onenek Bilboko itsasadarreko uretara egingo dute salto Salbeko zubitik, Guggenheim Museora begira jarriko duten plataformatik. Gizonezkoen kasuan, plataforma uretatik 27 metrora egongo da kokatuta; emakumezkoena, aldiz, 21 metrora.
Antolatzaileek jakitera eman dutenaren arabera, aurtengo Munduko Serietan parte hartzen ari diren jauzilariak orduko 85 kilometroko abiadura harrapatzeko gai izan dira uretarako bidean, eta 3 segundo behar izan ohi dituzte uretara iristeko.
Txapelketak Bilbon izango du azken geralekua. 2018ko ekitaldian, 25.000 ikusle baino gehiago bildu ziren ikuskizunaz bertatik bertara gozatzera, bai itsasadarreko bi bazterretatik, bai itsasontzi pribatuetatik.
Parte-hartzaileek ostegunean, hilaren 12an, ekingo diete entrenamenduei. Biharamunean, lehiaketako lehendabiziko eguna izango da, 16:30etik 18:15era bitartean egingo dituzten kanporaketekin. Azkenik, hilaren 14an, larunbatarekin, txapelketako bigarren egunaren txanda izango da, 16:30etik 19:15era jokatuko diren azken kanporaketekin.
Une honetan, Gary Hunt britainiarra (960 puntu) dago gizonezkoen kategorian sailkapenaren buru, eta haren atzetik daude Jonathan Paredes mexikarra (590) eta Andy Jones estatubatuarra (450), hurrenez hurren. 2015eko eta 2018ko ekitaldietan Bilbon garaile izan zen Steven Loblue estatubatuarra, berriz, hamargarren postuan dago sailkatuta.
Emakumezkoen sailkapenari dagokionez, Rhiannan Iffland (1.000 puntu) da liderra, eta Jessica Macaulay britainiarra (540) eta Yana Nestsiarava bielorrusiarra (510) daude zerrendan hurrengo.
El Nido (Palawan, Filipinak), Dublin (Irlanda) eta Beirut (Libano) izan dira aurtengo txapelketako nobedade nasugiak egutegian. Italiak, Portugalek eta Bosnia-Herzegovinak beren txapelketa izan dute aurten ere; finala, berriz, Bilbon izango da. Gainera, txapelketako geldialdi guztietan gizonezkoen zein emakumezkoen lehiaketak jokatu dira.
RED BULL CLIFF DIVING 2019, EGUTEGIA
Apirilak 13, El Nido (Palawan, Filipinak)
Maiatzak 12, Dublin (Irlanda)
Ekainak 2, Polignano a Mare (Italia)
Ekainak 22, San Miguel (Azoreak, Portugal)
Uztailak 14, Beirut (Libano)
Abuztuak 24, Mostar (Bosnia-Herzegovina)
Irailak 14, Bilbo (finala)
