Beste kirolak
ERRUGBIA
Jon Rahmek San Mameseko errugbiko ateak estreinatu ditu
AGENTZIAK | ERREDAKZIOA
Bilboko zelaiak Challenge Cupeko eta Championseko finalak hartuko ditu 2018ko maiatzaren 11n eta 12an.
-
Jon Rahmek hainbat golf pilota jaurti ditu errugbiko ateetara. Argazkia: EFE
Jon Rahm golf jokalari bizkaitarrak, munduko sailkapeneko laugarrena denak, San Mamesen jarritako errugbiko ateak probatu ditu astearte honetan "atera egindako jaurtiketa sinboliko" baten bitartez. Gaurko ekitaldia datorren urteko maiatzean Athleticen zelaian jokatzekoak diren errugbiko Europako txapelketen finalen gainean egindako lehendabiziko entsegua izan da.
Espainiako Errugbi Federazioak jakitera eman duenez, Rahmek zelaian jarritako zutoinak estreinatu ditu, zelai erditik hainbat golf pilota jaurtita.
San Mamesek Challenge Cupeko eta Championseko finalak hartuko ditu 2018ko maiatzaren 11n eta 12an, hurrenez hurren. Lehendabiziko aldia izango da kirol horretako Europako txapelketa nagusien tituluak Frantzia, Ingalaterra, Gales, Eskozia edota Irlandatik kanpo jokatuko direna.
