Faktoria
IBILIAN IBILIAN
Rakel Andres eta Santi Gasso: "Zaldibiara etxe bila etorri ginen egunean bertan jende mordoa ezagutu genuen"
Jon Artano Izeta
Herrialde Katalanetakoak dira sortzez, kaleumeak. Beren bizi-estiloan ziaboga eman eta baserri batean, eta baserritik, bizitzeko hautua egin zuten. Marroetxe erosi eta bertan bizi dira, Ñañarriren magalean.
-
Santi eta Rakel, Marroetxeko atarian.
29:42 min
36 egunez oinez egin zuen Zaldibiarainoko bidea bikote honek. Horregatik Faktoriak ere oinez egin du Marroetxe baserrirainokoa.
Bi katu -Aske eta Xagu- dituzte, oiloak eta dozenerdi sasi ardi ere bai. Baratza landuko dute udaberritik, eta ahuntz azpi-gorriak ere izan nahi dituzte. Gainera paella politikoak egiten dituzte, enkarguz. Ekarte gastronomikoetan prestatzen dituzte, eta eramateko ere jartzen dituzte.
Santi Gasso Buqueras eta Rakel Andres Dura-k pare bat urte daramatzate Zaldibian. Aurrez beste lauspabost urtez aritu ziren beren jaioterritik joan-etorrian, Marroetxe baserrian konponketak eta birgaitzeak eginaz. Zaldibiarrak jende jatorra direla diote. Jatorrak dira. Bereziak, baina jatorrak! esan du Rakelek. Geu ere bagara berezi samarrak errematatu du, barrez, Santik.
