Astronauta batek ongietorria eman dio Obamari… Irungo sanferminetara?

Iruñeko Udalaren aurrealdetik, astronauta batek ongietorria eman dio Barack Obama Estatu Batuetako presidenteari, San Fermin 2016 jaietara; hortik gertu, banderarik gabeko masta bat zegoen, eta milaka lagunek hori zuten hizpide; handik gutxira, El Tulik Irungo (bai, Irungo) sanferminei eman die hasiera; behean, aldiz, beste kezka bat zuten: kalean txiza ez egiteko produktu bat, alegia. Kontua da produktu horrek zera egiten duela: txiza errebotatzea, eta, ondorioz, bota duenaren zapatak eta prakak zikintzea. Hasi dira sanferminak, eta, ia beti bezala, txupinazoak ere badu alde ezkutu bat; azter dezagun jarraian.

Galaxiatik Etxe Zurira, Iruñetik igarota

Iruñea, 2016ko uztailak 6, 11:55ean; Lurrean, mundu osoa dago begira, ea El Tuli noiz ateratzen den sanferminetako txupinazoa botatzeko, festak eztanda egiteko; mundu osoa?? Ez! Astronauta bat, ez dakigu nondik heldutakoa bera, Iruñeko Udaletxeko balkoi batean agertu da eta pankarta bat zabaldu du, non ongietorria ematen dion San Fermineko jaietara nori eta Barack Obama Estatu Batuetako presidenteari. Eta ez, ez omen du behar izan inolako edabe magikorik horretarako.

Datorren larunbatean, AEBko Gobernuburua Etxe Zurian izango da, Iruñetik 6.100 kilometrora; baina igandean, aldiz, Sevillan izango da, Nafarroako hiriburuko 700 bat kilometrora. Susmoa zegoen, bidaiaren benetako helburua ez ote zen sanferminetara etortzea, eta gainera bere taldeko inork ez du ezeztatu? Hortaz, astronautak erabaki du aurreratzea, eta ongietorria eman dio Obamari: "Welcome, Mr Obama. Pamplona Rebel City" ("Ongi etorri, Mr Obama. Iruñea, Hiri Matxinoa"), hala zioen pankartak. MIR estazioan egina al da pankarta hau??

Iruñean da, ez Irunen

Obama jauna, ez nahastu, jaiak Iruñean dira, ez Irunen (hauek, sanferminak, aizu? agian San Martzialera Joan nahi duzu?). Zergatik diogun? Bada, El Tulik, Jesus Ilundainek, ohorezko matrikula lortu du berak txupinazoa botatzen, irundarrei egin dielako deia, suziria bota aurretik. Joseba Asiron alkateak esan dio hitza nolakoa den; beraz, agian Asironena da benetako errua? Ander Izagirre kazetaria ohartu da bitxikeria txiki honetaz, adi bideo honetako 1:42ko uneari:

El Tulik berrikuntza sartu du bere mezuan

Ohorezko matrikula, benetan, El Tulirentzat, oso merezita gainera. Txupinazoa bota aurretik esan duena, seguraski, eredua izango da ondorengo urteetan ere. Jesus Ilundainek "pamplonesas" esan du "pamploneses" baino lehen, eta ez da kasualitatea izan: "Emakume guztiei egin nahi nien aipamena, eta, batez ere, sexu-jazarpena pairatzen dutenei", esan du El Tulik. "Horren aurkakoa naiz, nahi dut neure burua eskaintzea, edozertarako, laguntza emateko", gehitu du. Jesus beti ahalegindu da emakumeak peñen bazkideak izateko (Los de Bronce taldean, Tuliren taldean alegia, aitzindariak izan ziren), eta txarangekin irteteko; honetan, sanferminek "hobera egin dute", El Tuliren iritziz.

Masta bat hutsik, Udaletxean

Asiron alkateak azaldu du: ikurrina Udaletxeko balkoitik ez egoteak ekartzen du ez daudela ordezkatuta iruindar guztien sentsibilitateak. Iruña, Nafarroa, Espainia eta Europar Batasunaren banderak izan dira, eta aldamenean banderarik gabeko masta bat: "Islatu nahi dugu gure hirian aniztasuna dagoela, sentimenduei dagokienez, eta San Ferminen ere hori islatu beharko litzateke", esan du Asironek. Joxe Abaurrea alkateordeak nabarmendu duenez, Iruñeari, aurten "haren aniztasunaren zati bat kendu diote; eta horrek eragina du elkarbizitzan".

Kalean, adi ea txiza noiz egiten dugun?

Iruñean egun hauetan daudenek bi aldiz pentsatu beharko lukete kalean txiza egitea merezi duen; izan ere, txiza ez egiteko produktu bat hasi dira erabiltzen udal-teknikariak. Ondorioa ez da nolanahikoa: txizak errebotatzen du, eta bota duenaren prakak eta zapatak zikintzen ditu. Xedea da 10.000 bat euro aurreztea, garbiketan eta desinfekzioan, eta txizak uzten duen irudi txarra saihestea, jakina.