Larri dagoen iruindarrak estatubatuarraren bikotekideaz abusatu zuen

Estatubatuar baten kolpe bat hartu ostean oso larri dagoen iruindarra haren bikotekideari abusuak egiten saiatu zen, bikotea kaletik paseoan zebilela emakumezkoarengana hurbildu ondoren, auto judizialaren arabera. Atzerritarra behin-behinean aske uzteko agindu du epaileak bertan.

Igandeko entzierroaren ostean gertatu zen guztia, Estafeta kalean. Atxilotuak Iruñeko bizilagunari kolpe bat eman zion, eta, iruindarra lurrera erori zen eta buruan kolpea hartu zuen.

Azken parte medikoaren arabera, iruindarra (41 urte ditu) "eragindako koma-egoeran dago, egoera kritikoan", ebakuntza egin eta gero.

Nafarroako Justizia Auzitegi Nagusiak jakitera eman duenez, guardiako epaileak gazte estatubatuarra behin-behinekoz aske uzteko agindu du, baina ezin izango du Espainiatik alde egin, eta, non biziko den zehazteko hogeita lau orduko epea izateaz gain, astean birritan agertu beharko du epaile aurrean.

Estatubatuarrak barkamena eskatu du, eta epaileak lesioak egitea eta zuhurtziagabekeriaz lesioak egitea egotzi dizkio.

Epailearen autoaren arabera, Estafeta kalean jarritako kamerek hartutako irudietan ikus daitekeenez, "ezezagun bat atzerritarraren bikotekidearengana joan zen, horma baten kontra jarri zuen eta, gerritik helduta zuela, musuak ematen saiatu zen", eta hori ikusi ostean jo zuen atxilotuak erasotzailea.

Akusatuaren bikotekideak deskribatutako gertaerak

Epailearen arabera, akusatuaren bikotekideak berretsi egin ditu gertaera horiek, eta, hori dela eta, emakume hori ere "biktima" dela esan du epaileak.