Urkullu: 'EAJ da PSE-PP itunaren alternatiba bakarra'

Iñigo Urkullu EAJko presidenteak adierazi du bere alderdia "alternatiba bakarra" dela PSE-PP itunaren aurrean eta "haren Gobernua menperatuta dagoen bitartean twitteatzen dagoen lehendakariaren aurrean".

Urkullu Bilboko Casilla pabilioian izan da, EAJk hauteskunde-kanpainari amaiera emateko egindako ekitaldian. Besteak beste, EAEko hiru hiriburuetarako alkategaiak, ahaldun nagusigaiak eta Juan Jose Ibarretxe lehendakari ohia ere izan dira bertan.

EAJko presidenteak kritikatu egin du PSE-PP itunak sortutako "nahastea", eta Euskadin "normaltasuna eta oasia" dutela esaten dutenek "hainbat gatazka" sortu dituztela gaineratu du. "Zorra sei bider handitu dute bi urtetan, eta Euskadin azken 15 urteotako langabezia tasa handiena dago", gogorarazi du.

Urkulluk gogora ekarri du Euskadin beste krisi larri bat izan zela duela 30 urte, eta gainditzea lortu zuela, "lider" bihurtuta, "Euzko Alderdi Jeltzalearen lidergoari esker".

"Hori zen kudeaketa, eta ez Lopezen eta PPren gaitasun eza. Baina arazoa larriagoa da: Lopez Ajuria Eneko dibanean etzanda eta saxofoia jotzen ari dela simulatzen ez dagoenean, twitteatzen dago".

Aitzitik, EAJ "udaletatik eta aldundietatik Euskadi krisitik ateratzeko tematuta dago".

Urkulluk terrorismoa ere hartu du hizpide. Bere esanetan, gizarteak "indarkeria, fronteak, terrorismoa eta bloke itxiak atzean utzi nahi ditu. Gizarteak aurrera egin nahi du, seguru eta erdiko bidetik, muturrak saihestuta, eta horretarako, EAJ da bermea".

"Herrialde hau aurrerapenera eta normalizazio politikora eramango dugu, Euskadirentzat etorkizuneko proiektua baitugu eta hori gauzatzeko pertsonak baititugu. Gizarteak gobernua, zorroztasuna, ziurtasuna eta sinesgarritasuna nahi badu... gu gara Euskadiko etorkizuna gidatuko duen alderdia", berretsi du.

Urkulluk nabarmendu du "indarkeria ezaren, normalizazio politikoaren, susperraldi ekonomikoaren, enplegu sorkuntzaren eta askatasunaren unea" dela. "EAJren unea da. Hauteskundeak irabazi beharra dago. Hauteskundeak irabazi egingo ditugu", azpimarratu du.