Olanok euskal zerbitzu sozialen eredu 'eraginkorra' aldarrikatu du

Markel Olano Gipuzkoako ahaldun nagusigaiak euskal zerbitzu sozial "eraginkorragoa" eskainiko duen eredu baten aldeko apustua egin du.

Zumaian egindako hauteskunde-ekitaldi batean, Olanok "finantziazio ereduaren inguruko gogoeta bat" eskatu du "ongizate sistema bermatzeko".

"Zerbitzu sozialen eskaria geroz eta handiagoa da eta kudeaketa eredu berritzaile bat ezarri behar dugu Gipuzkoa elkartasun espazio handi bilakatzeko", adierazi du ahaldun nagusiak.

Gainera, "adinekoei, bazterketan erortzeko arriskuan daudenei eta langabeei laguntzeko" beharra azpimarratu du Olanok.

Dena dela, hautagai jeltzaleak azaldu duenez, Euskadik eta Gipuzkoak "zerbitzu sozialen eredu aurreratuena dute Estatuan, enpresa publiko eta pribatuen artean urtetan emandako lankidetzari esker".