EBk nuklearrak itxi eta berriztagarriekin ordezkatzea eskatu du

Gaspar Llamazares IUren diputatuak esan du Fukushimako (Japonia) hondamendi nuklearraren ondoren Garoñakoa eta zentral nuklearren eredu osoa krisian sartu dela, eta energia nuklearra itxi eta energia berriztagarriekin ordezkatu behar dela.

Gasteizko Artium museoaren parean zentral nuklearren kontra Ezker Batuko militante eta hautagaiek egin duten ekitaldi batean egin ditu adierazpenok Llamazaresek.

IUren buruzagiak salatu du Fukushimako istripua gertatu zenean Espainiako Gobernuak, PSOEk eta PPk "beste alde batera" begiratu zutela eta are gehiago, Garoñako zentralaren itxiera atzeratu dutela, nahiz eta aurten itxita egon behar zuen.

Jose Navas EBren Gasteizko alkategaiak ohartarazi du hirian ez dagoela istripu nuklearrei aurre egiteko planik, beraz, Ezker Batuak Gasteiz larrialdi-nuklearren planean sartzea aldarrikatu du.