Alkatearen eta zinegotzien soldatak jaitsi ditu Iruñeko udalbatzak

Alkatearen eta zinegotzien soldatak jaistea adostu du Iruñeko udalbatzak legegintzaldiko lehendabiziko osoko bilkuran. Joseba Asiron alkatearen kasuan, jaitsiera % 16koa izango da, eta % 20koa, berriz, hainbat zinegotziren kasuan. Halaber, erabateko edota zatiko arduraldia ez duten zinegotzien asistentzia erregimena ere aldatu dute.

Joseba Asiron alkatea buru izan duen lehendabiziko osoko bilkuran aurrera atera da Alkatetzak soldaten inguruan egin duen proposamena. Dena den, ez da aurrera atera EH Bilduk dieten inguruan proposaturikoa, eta UPNren zuzenketa onartu da, erregionalisten eta sozialisten botoei esker.

Zuzenketa hori aintzat hartuta, erabateko edo zatiko arduraldia ez duten zinegotziek 200 euroko ordaina jasoko dute saio bakoitzeko. EH Bilduk, ostera, gehienez ere 10.000 euroko ordaina jasotzea proposatzen zuen.