Udal eta Foru Hauteskundeak -
Gipuzkoako batzarra
Akordioetan oinarritutako oposizio eraikitzailea iragarri du EH Bilduk
Koalizioko kideek adierazi du gai batzuk kudeatzeko moduak birbegiratu behar dituztela gauzak egiteko moduak herritarrekin adosteko.
AGENTZIAK | ERREDAKZIOA
Gipuzkoako EH Bilduk iragarri du "oposizio eraikitzailea" egingo duela lurraldeko Batzar Nagusietan eta baita udaletan ere, beti ere, Gipuzkoak aldaketa politiko eta sozialaren bidean aurrerapausoak eman ditzan.
"Eta herritarrek alkatetza EH Bilduri eman dioten herrietan eredu sozioekonomiko berri baten aldeko apustua egiten jarraituko dugu eta ahalegin handiagoa egingo dugu gure ekimenak zein proiektuak herritarrekin partekatzeko, erritmoak eta prozedurak pausatuz", gaineratu dute.
EH Bilduk Gipuzkoako batzarra egin du Lazkaon maiatzaren 24ko hauteskundeetako emaitzak aztertzeko eta koalizioak berak aitortu du lorturiko emaitzak ez direla onak izan.
"Politika egiteko moduei dagokienean, hainbat hobekuntza egin behar ditugu. Erabaki politiko garrantzitsuenak hartu baino lehen denbora gehiago eskaini behar diogu gure proiektuak eta ekimenak herritarrekin partekatzeari, beren iritzi, behar eta desioak entzuteari eta prozesu partekatuak diseinatzeari", azpimarratu du.
Bestalde, EH Bilduk azpimarratu du bere lehentasunen artean dagoela erabakitzeko eskubidea agenda politikoaren erdigunera eramatea. "Euskal Herria bidegurutze historiko baten aurrean dago eta EH Bildu egoerak eskatzen duen mailan egongo da", gaineratu du.
Azkenik, mugimendu sozialekin eta orokorrean gizartearekin loturak sendotzea adostu du EH Bilduk beren lana erakundeetara soilik ezin dela mugatu iritzita.
