Barkosek eta Chivitek Kongresuko eta Senatuko karguak utziko dituzte

Nafarroako foru hauteskundeek oraindik ez dute argitu nor izango den hurrengo Gobernuko presidentea, baina jakina da Uxue Barkosek eta Maria Chivitek lortu dituzten parlamentari karguak bateraezinak direla egun Kongresuan eta Senatuan dituzten eserlekuekin; beraz, uko egingo diete Madrilgo ardurei.

Barkos da Geroa Baik Kongresuan duen ordezkari bakarra, eta orain Nafarroako Gobernuan osatzeko zeregina du. Hala, aste honen amaieran egingo dio uko diputatu karguari, ostegunean Estatuaren eta Nafarroaren arteko harremanak finkatzen dituen Itun Ekonomikoaren eztabaidan parte hartu ostean, alderdiak berak jakitera eman duenez.

CISen inkestetan puntuazio altuena lortzen duen politikariaren lekua Bixente Serrano Izko historialariak hartuko du, 2011ko hauteskundeetan Geroa Bairen zerrendan bigarren zihoanak.

Data zehatzik ez badago ere, Maria Chivite PSNren zerrendaburuak ere Senatuan duen kargua, PSOEren bozeramailetza, utzi egingo du.

Kasu honetan, PSNk esan du ixteko dagoela agenda, baina oraindik astia duela parlamentari gisa kargua hartu aurretik.

Bere lekua Javier Sanz Carramiñanak hartuko du, ganbera oso ondo ezagutzen duen batek, 1999tik 2003ra eta 2007tik 2011ra senatari izan baitzen.