Artur Masen Gobernu berrian parte hartzeari uko egin dio Pere Navarrok

Pere Navarro PSC alderdiko buruak Artur Mas Generalitateko jarduneko presidentearen eskaintza baztertu du. Gobernu ituna sinatzea edo Kataluniako gobernagarritasuna erraztea eskatzen zion horrek. “Ez dira Masekin akordioa lortzeko baldintzak betetzen”, gaineratu du Navarrok.

Artur Mas Kataluniako jarduneko presidenteak atzo jakinarazi zuenez, independentziaren inguruko galdeketa “lehentasuna” izango da, gainerako alderdiekin balizko gobernu akordioak negoziatzeko garaian. Hala, ERC (Kataluniako Parlamentuko bigarren indarra) alderdiarekin akordioak lortzen saiatuko dela adierazi zuen, PSC baztertu gabe.

Ser irrati kateari eskainitako elkarrizketan, sozialistengana orain jotzea aurpegiratu dio Navarrok jarduneko presidenteari, aurreko legegintzaldian “gobernagarritasuna bermatzeko” eta “Katalunia aurrera ateratzeko” hainbat proposamen baztertu zituenean.

CiU alderdiarekin hitz egiteko prest dagoela azpimarratu badu ere, CiUren agenda eta PSCrena kontrakoak direla argudiatu du; “gizarte alorrean murrizketak egitea eta nazio mailan independentzia lortzea dituzte helburu”.

ERC ez da Govern berriko kide izangoERC ez da Kataluniako Gobernu berrian egongo, eta oposizioko burua izaten saiatuko da, atzo Oriol Junquerasek iragarri zuenez. Hala ere, CIUrekin “oinarrizko helburuak” jasoko dituen agenda bat adosten saiatuko da. Helburu horien artean, horren esanetan, erabakitzeko eskubidearena egongo da.

Hauteskundeetako emaitzak aztertzeko bileraren ostean, Junqueras ERC ko hautagaiak hitz egin zuen. Horren hitzetan, CiUk irabazi ditu hauteskundeak, baina “nazio mailako helburuak eta ekonomikoak” bat etorri behar dira “eta ezin dira bereizi”.

Nazionalisten eta sozialisten arteko balizko gobernu akordioaz galdetuta, bien arteko akordioa gerta daitekeela uste du Junquerasek.