Kataluniako Hauteskundeak 2024 -
Irailak 27
'Catalunya, si que es pot' zerrenda aurkeztu dute I27ko bozei begira
Artur Masen zerrenda bateratuaren alternatiba gisa aurkeztu dute. ICV, EUiA eta Podemos alderdiek osatuko dute, baina aurrerago alderdi gehiago batzea espero dute.
AGENTZIAK | ERREDAKZIOA
"Catalunya, Sí que es Pot" hautagaitza aurkeztu dute igande honetan Bartzelonan, Kataluniako irailaren 27ko hauteskundeei begira. ICV, EUiA eta Podemos alderdiek osatuko dute zerrenda eta "subiranotasun betearen" defendatzaile gisa agertu dira gizarte, nazio zein demokrazia alorretan.
Bartzelonako Sant Andreu auzoko Fabra y Coats lantegi zaharrean egindako prentsaurrekoan, "Catalunya, Sí que es Pot" hautagaitza eta "Katalunaiko aldaketa sozialaren eta politikoaren aldeko adierazpena" aurkeztu dute ICVko Dolors Camats eta Joan Herrera, EUiAko Joan Josep Nuet eta Podemoseko Gemma Ubasart kideek.
Dolors Camatsek azaldu du "Catalunya, Sí que es Pot" "hasiera" bat dela eta ateak irekita dituela etorkizunean alderdi gehiago bertara batu daitezen, besteak beste, Proces Constituient.
ICVko buruzagiaren hitzetan, gaur aurkeztu duten hautagaitzaren aurrean "jarraipena dago", hots, "lau urtean murrizketak egin dituztenak, lehen postuan dagoena dagoela" -zuzenean aipamenik egin ez badio ere, Raul Romeva ICVko kide ohia buru izango duen zerrenda bateratuari egin nahi izan dio aipamena-.
Masen zerrenda bateratuaren alternatiba gisa aurkeztu dute beren burua. Halaber, hautagaitzaren sorrerako manifestuan irakur daitekeenez, Kataluniako Errepublikaren alde daude.
