Rajoyk ez du aldaketarik egingo Gobernuan

Mariano Rajoy Gobernuko presidenteak astearte honetan azaldu duenez, ez du aldaketarik egingo Gobernuan, Europako hauteskundeen ostean. Halaber, PPk irabazi dituela nabarmendu du, baina oraingo honetan babesa emateari utzi dioten pertsonak ulertzen dituela adierazi du.

Rajoyk lehenengo aldiz hitz egin du publikoki, igandean izan ziren Europako hauteskundeen emaitzak jakin ostean, Europako Alderdi Popularraren buruek Bruselan egin duten bilerara kazetariei egindako adierazpenetan.

Hauteskundeen emaitzen balorazio bat eskatuta, Maria Dolores de Cospedal PPko idazkari nagusiak esandako hitzak errepikatu ditu. Azken horrek atzo PPk irabazi zuela esan zuen, baina alderdiaren dinamizazio plan bat behar zela gaineratu zuen galdutako babesa berreskuratzeko. Plan hori Rajoyk berak iragarri zuen, PPko Batzorde Exekutibo Nazionaleko bileran.

Halaber, PPk irabazi dituela hauteskundeak Espainian azpimarratu du, eta alderdiari botoa eman dioten guztiei eskerrak eman dizkie garai "oso zailen" ostean, erabaki korapilatsuak hartu behar izan direla eta jende askori gustatu ez zaizkiela gaineratu du.

Testuinguru horretan, adierazi du: "Garai batean konfiantza eman eta orain kendu diguten pertsonei ulertzen diet".

"Erabaki guztiek emaitzak izango dituzte"

Halaber, hemendik aurrera, Espainian oraingo legealdiko arorik onena bizituko duela konbentzituta azaldu da, eta herritarrek "eskatutako sakrifizioek eta esfortzuek" zentzua zutela ikusi ahal izango dute, gaineratu du.