Euskal alderdiak ez datoz bat lehendakariak hartutako erabakiarekin

Iñigo Iturrate EAJren Parlamentuko taldeko koordinatzaileak iragarri du Alderdi Eguna ez dela irailaren 25ean ospatuko, lehendakariak EAE-ko hauteskundeak egiteko aukeratutako data bera delako.

Bilbon egindako prentsaurreko batean, Iturratek lehendakariaren iragarpenaren ostean hitz egin du, eta azaldu du EBB datorren igandean bilduko dela alderdiaren jaiaren eguna noiz egitea erabakitzeko.

EAJren legebiltzarkideak gaineratu duenez, erabaki horrek erakusten du alderdiak "hiritarren eta herrialdearen interesak" lehenesten dituela, alderdiaren interesen aurrean.

Era berean, Iturrateren iritzian, lehendakariak hartutako erabakia "posibleen artean onena" izan da, eta alderdiak bat egiten du.

EH Bildu

Arnaldo Otegi EH Bilduren bozeramale eta lehendakarigaiak ziurtatu du ez dituela ustekabean harrapatu hauteskundeak aurreratzeak eta, gainera, "lanean harrapatu" dituela azpimarratu du.

"Ez gaitu ustekabean harrapatu ez iragarpena ezta data ere", esan du Otegik, Pello Urizar EAren idazkari nagusiarekin, Ohiane Zabaletarekin eta Josu Estarronarekin batera Donostian egindako prentsaurreko batean.

Gainera, Otegik adierazi du errespetatu egiten duela lehendakariak data aurreratzea, Espainiako politikan dagoen "ziurgabetasuna" dela eta, baina ez dagoela ados, "inolaz ere, egoeraren azterketarekin".

PSE-EE

Idoia Mendia PSE-EEren idazkari nagusiak salatu egin du Eusko Jaurlaritzak azken urtean egindako guztia, "euskal hauteskundeen deialdia barne", "hauteskundeetan pentsatuta, EAJren eta horren hautagaiaren mesedetan" izan dela, "herrialdearen eta herritarren" mesedetan beharrean.

Agintari sozialistaren esanetan, albistea "uztailaren bukaeran etorri da, presaka, antza, ez zegoelako Urkulluren planen artean, alegia, hauteskundeak data horretan egitea".

Zentzu horretan, "batzuk ezustean harrapatuko zituen", baina ez PSE-EEko kideak, "aurretik lana egin dutelako, beti bezala". "Eta prest gaude oso garrantzitsutzat jotzen dugun erronka bati aurre egiteko, bereziki, euskal gizartearen etorkizunarentzat".

PP

Nerea Llanos Euskadiko PPren idazkari nagusiaren iritzian, hauteskundeak aurreratzea lehendakariaren eta EAJren "interes partikular" baten ondorio da, baina "porrot egin duen legealdi bati" amaiera emango dio.

Hala, Llanosen arabera, hauteskundeen eguna aurreratzea oporren hasieran "ez da unerik egokiena horren garrantzitsua den iragarpena egiteko". Era berean, azpimarratu egin du hautatutako data, irailaren 25a, "eztabaidagarria da".

Podemos Euskadi

Nagua Alba Podemos Euskadiko idazkari nagusi eta Elkarrekin Ahal Duguren diputatuaren ustean, "presaka" hartutako erabakia da Urkulluk hartutakoa, eta "alde batetik -EAJ- beldur" dela uste du. Gainera, Albaren aburuz, "ez dute aurrekanpaina egotea nahi eta kanpaina arina eta hotza izatea nahi dute, hein handi batean legealdia izan den moduan".

"Zuhurtziagabekeria da euskal gizartearentzat hain garrantzitsua den data batekin jolastea", esan du Albak, erabakia "alderdiaren, lehendakariaren eta EAJren interesetan pentsatuta" hartu dutelako erabakia, "euskal gizartearen" interesetan oinarritu beharrean.

Horren ildotik, Albaren arabera, lehendakariak "Madrilera eta Estatuaren gobernagarritasunari" begira hartu du erabakia, baina, Podemosen iritzian, "badago beste faktore garrantzitsu bat". "Egia da Madrilen hartzen diren akordioekin adi daudela, azken asteetan gertatutakoa ikusita".