EITB TALDEA
Doako streaming plataforma
Euskal literaturaren hilabetea izango da apirila GUAU audio-plataforman, eta 11 audio-liburu plazaratuko ditu
EITB
Ramon Saizarbitoria, Arantxa Urretabizkaia, Anjel Lertxundi, Harkaitz Cano, Iban Zaldua, Jon Arretxe eta Toti Martinez de Lezea egileen lan ezagunak izango dira sarean. Lehen liburua apirilaren 1ean sareratu da: Ramon Saizarbitoriaren 'Ehun Metro'.
Albisteak (3)
Bideoak (1)
Informazio gehiago (1)
Euskal Literaturaren Hilabetea ekimena EITBren GUAU audio plataforman garatutako proiektu berritzailea da, apirilaren 1etik 23ra bitartean euskarazko 11 audio-liburu argitaratuko dituena. Ekimen horren bidez, euskal literaturaren aberastasuna modu berritzailean eta eskuragarrian zabaldu nahi da, irakurleak eta entzuleak euskal letretako egile handien obretara hurbilduz. Euskal idazle garaikide handien lanak formatu digitalean izango dira eskuragarri, euskarazko sormen-lanak sustatu eta audioaren bitartez literatura biziberritzeko.
Gaur bertan sareratu da lehen liburua, Ramon Saizarbitoriaren Ehun Metro, alegia (Iñaki Beraetxe ahots nagusian, Maddalen Arzallus, Asier Hormaza, Kiko Jauregi, Mikel Garmendia, Joxe Felipe Auzmendi eta Iñigo Aranberrirekin batera. Asteazkenean, Arantxa Urretabizkaiaren Zergatik Panpox (Maria Redondo) eta ostiralean Anjel Lertxundiren Hamaseigarrenean, aidanez (Monika Erdozia) izango dira eskuragai.
Hurrengo astean, Harkaitz Canoren lau eleberri argitaratuko dira, guztiak ere Joxe Felipe Auzmendiren ahotsean: apirilaren 7an, Twist; apirilaren 9an, Fakirraren ahotsa; apirilaren 10ean, Beti oporretan, eta apirilaren 11n, Telefono kaiolatua. Astelehen horretan bertan (apirilak 14), Jon Arretxeren Xahmaran (Ainhoa Aierbe) eta apirilaren 17an, Anjel Lertxundiren Horma (Iñaki Beraetxe) izango ditugu eskuragarri streaming plataforman. Sorta osatzeko, apirilaren 21ean, Iban Zalduaren Etorkizuna (Iñaki Arretxe) eta 23an, Toti Martinez de Lezearen Judu-kale (Monika Erdozia).
Euskarazko 11 audio-liburu argitaratzearekin EITBk euskal kultura eta hizkuntza sustatzeko konpromisoa sendotzen du, euskal literatura kontsumo-ohitura digital berrietara egokituz, belaunaldi gazteen artean zabaltzea sustatzeko. Audio formatuak gorakada nabarmena izan duen testuinguruan, ekimen honek euskal idazle ospetsuen lanetara hurbiltzeko aukera errazten du, ez bakarrik irakurriz, baita entzunez ere, irakurketarako zailtasunak dituztenentzat edo formatu hori nahiago dutenentzat oztopoak kenduta. Audio-liburuon bidez, EITBk euskarazko sormen-industrian laguntzen du, idazleei, narratzaileei eta ekoizleei tartea, eta aldi berean, euskal literatura Euskal Herritik haratago zabaltzeko aukera emanda.
