Laso vs P. Etxeberria Lau T'erdiko final handia, igandean, EITBko kanaletan

Igande honetan (azaroak 24) Unai Lasok eta Peio Etxeberriak Bilboko Bizkaia pilotalekuan jokatuko duten Lau T'erdiko Txapelketako finala zuzenean ikusi eta entzungo da EITBko hedabideetan: ETB1, Euskadi Irratia, Radio Euskadi eta eitb.eus.

"ETB Kantxa" 16:10ean hasiko da ETB1en eta eitb.eus-en, Jon Balenziagak aurkeztuko duen atariko saioarekin. Bertan, aurtengo txapelketaren errepasoa egingo du Pedro Mari Goikoetxearekin eta Gentzane Aldairekin. Ondoren, Xabier Euzkitzek hartuko du lekukoa, Urrutikoetxea-Mariezkurrena / Ezkurdia-Zabaleta norgehiagoka ere barne hartuko duen jaialdiaren kontakizuna egiteko; ohi denez, Elena Azpeitia, Abel Barriola eta Mikel Idoate izango ditu lagun. Bestalde, finala amaitu ostean, finalaren analisia egingo dute Balenziagak, Goikoetxeak, Aldaik, Barriolak eta Idoatek EITBren set berezian, eta bertatik pasako dira, nola ez, txapelduna eta txapeldun ordea.

Bestalde, Euskadi Irratian Kepa Iribarrek, Txetxu Urbietak eta Oinatz Bengoetxeak kontatuko dute partida Bizkaia pilotalekutik zuzenean "Hiru Erregeen Mahaia" saioan. Radio Euskadiren kasuan, berriz Mikel Bilbao, Raúl Pando eta Peio Martínez Eulate izango dira bidali bereziak. Asier Kareagak gidatuko duen "Kirol Festa" saioaren barruan jarraitu ahal izango da kirol hitzordu garrantzitsua.