EITBk "Holobionte" soinu fikzioa aurkeztu du, Madrilen

EITBk asteazkenean, azaroak 6, aurkeztu du Madrilen Holobionte soinu-fikzioaren lehen denboraldia, zientzia-fikzioa eta thriller generoak uztartzen dituen apustua, Holobiontea euskarazko audioseriearen arrakastak urratutako bideari jarraituz.

Donostiako Zurriola hondartzan hilda agertu den eta izenik ez duen espezie arraro bateko izakia du lanak ardatz. Surflari batek topatu du itsasertzean, eta munduko komunitate zientifikoaren arreta piztu du aurkikuntzak, Matthew Mendoza euskal jatorriko ikerlari estatubatuarra ere Euskal Herrira erakartzera arte. Idurre Aldazabal EHUko biologia irakasleari deitu dio, Eusko Jaurlaritzak osatutako ikertzaile taldearen buru izan dadin. Segituan ohartuko dira, ordea, ez dela izakia sarean erori dena, gizakiak baizik. Ez dago espezieen katalogoan sailkatua, baina harraparia da. 

Lehen mailako aktore taldea dugu Holobionte lanean, besteak beste, Miren Gaztañaga, Asier Hormaza, Aitziber Garmendia eta Iban Garate. Musika Maite Larburu biolin jotzaile, konpositore eta abeslariak sortu du, eta artearen diseinua  Berlinen bizi den Alain Urrutia euskal artistak. Edukia ekoizteaz arduratzen den ULU Media Estudios podcast eta audioak sortzen eta diseinatzen hasiberria izanagatik, ikus-entzunezko komunikazioaren munduan sari garrantzitsuak jaso ditu, hiru izendapen eta Ondas Sarietan soinu-diseinu onenaren Aipamen Berezia, besteak beste.

Aurkezpena Madrilgo Irakurle Etxeko Auditorioan (Matadero) egin da, Xabier Garcia Ramsden EITBko kazetariak aurkeztuta. Bertan izan dira Maite Goñi, EITB Mediako Irrati eta Audio zuzendaria; Oier Aranzabal, Holobionteren zuzendaria; Xabier eta Martin Etxeberria gidoilariak eta Asier Hormaza eta Aitziber Garmendia aktoreak. Gainera, Maite Larburuk, jatorrizko soinu-bandaren egileak, ekitaldian zehar jo du.

Fikzioa eta soinu-sorkuntza bultzatzea da EITBren zutabeetako bat, estrategia digitalaren baitan, eta, horrek, GUAU soinu-plataformaren hurrengo etorrera ekarriko du 2025ean. Plataforma hori Euskadiko audio-eduki digitalen ekoizpen eta banaketa digitala gidatzeko eta jatorrizko ekoizpenak beste hizkuntza batzuetara hedatzeko asmoz sortuko da. Holobiontearen gaztelaniazko bertsioaren aurretik, euskal ikus-entzuleek harrera ona egin diete trilogiaren euskarazko bi denboraldiei, eta eskuragarri daude EITBPodkast eta audio-agregatzaile nagusietan.

Pertsonaia nagusiak:

Idurre Aldazabal (Miren Gaztañaga)

35 urteko zientzialari gaztea eta Holobiontearen ikerketa taldeko burua. Gaztea izan arren, lizun sinbiotikoen gainean egindako ikerketak nazioarteko zientzialarien errespetua irabazi du, gai horretan aditu nagusietakoa baita. Metodikoa, ausarta eta sentimenduak azaleratzeko uzkurra da.

Imanol Sanchez  (Asier Hormaza)

51 urte. Ertzaina, zerbitzu berezietan ibilbide luzea duena. Horregatik irabazi du pertsonaia hotz eta kalkulatzailearen ospea. Eraginkorra eta aldi berean eszeptikoa, umore kaustikoa du, baina, nahiz eta eman ez, Aroa eta Idurre zaintzen ditu.

Aroa Telleria  (Aitziber Garmendia)

22 urteko ikasle gaztea da, Idurre Aldazabalen ikaslea. Neska oso argia da, friki samarra eta teoria konspiranoikoen sinestun sutsua. Idurre haren tesiaren arduraduna da eta harreman oso estua dute, eta Aroak are estuagoa izatea nahiko luke.

Fitxa tekniko eta artistikoa

Zuzendaria: Oier Aranzabal

Gidoilariak: Martin Etxeberria eta Xabier Etxeberria

Aktore zuzendaria: Anartz Zuazua

Grabazioa eta soinu diseinua: Jon Gartzia eta Alai Ormazabal

Soinu banda orijinala: Maite Larburu

Artea eta irudia: Alain Urrutia

Aktoreak: Miren Gaztañaga, Iban Garate, Asier Hormaza, Aitziber Garmendia. Markel Sainz, Naomi Mendizabal, Klara Badiola eta BIEUSE, Bikoiztaile Euskaldunen Elkartea. 

Off ahotsa: Luis Alberto Casado

Holobionte seriea ULU Mediak grabatu, editatu eta ekoitzi du Lasarteko ULU estudioetan, EITBPodkast plataformarentzat.