Eva Caballerok Concha García Campoy Kazetaritza Zientifikoko saria jaso du

Eva Caballero Radio Euskadiko "La Mecánica del Caracol" irratsaioko zuzendariak Concha García Campoy Kazetaritza Zientifikoko saria jaso du asteazken honetan Madrilen. Onkologia Ikerketen Zentro Nazionalean (CNIO) egin den ekitaldian, Maite Goñi EITB Mediako Audio eta Digitaleko zuzendaria eta Txema Mora Radio Euskadiko Programen arduraduna izan ditu lagun. 

Eva Caballeroren Perseverance, el rover capaz de buscar huella de vida, listo para aterrizar en Marte izeneko lana irrati kategorian nabarmendu dute. Bertan, UPV/EHUko ikerlariek NASA agentziako MARS 2020 misioan izandako partaidetzaz hitz egin zuten, jaurtiketaren bezperan. Erabili izan dituzten instrumentu zientifikoen funtzionamendua azaltzeaz gain, Martera joango diren misioen helburuak zehaztu zituzten. Saioak, gainera, Raúl Ibáñez UPV/EHUko irakasleak gidatutako matematikari buruzko tartea eskaini zuen, zientzia honek gure eguneroko bizitzan dituen aplikazioei buruzkoa. 

"Somos una radio pública y la ciencia siempre ha sido una apuesta por esta emisora. La ciencia hace que las sociedades sean más democráticas y menos proclives a que haya noticias falsas y a creernos cualquier cosa que dice un influencer", @animalmecanico

— AcademiaTV (@academia_tv) March 29, 2023

Telebistako Akademiak sortutako Concha Garcia Campoy Kazetaritza Zientifikoko sariek ibilbide profesionalen eta kazetaritza lanen bikaintasuna nabarmentzen dute: ikerkuntza, dibulgazio zientifikoa eta osasunarekin lotutako istorioak, etika eta konpromisuarekin, gizarteari zorroztasunez helarazten dizkioten lanak, hain zuzen ere. Azpimarratu beharra dago Estatu mailan, irratian, egunero emititzen den dibulgazio irratsaio bakarra dela Eva Caballerok gidatu eta zuzentzen duen "La Mecánica del Caracol".

Zazpigarren edizioko gainerako irabazleak honako hauek izan dira: Jose Corbella kazetaria, ibilbide profesionalaren kategorian; La 2 kanaleko "Crónicas" saioak eskainitako Antropoceno nuestro legado en las rocas erreportajearen lantaldea; Laura Chaparro kazetaria, Muy Interesante aldizkarian publikatutako Los microorganismos son los amos erreportajearengatik, idatzizko prentsa kategorian; eta Veronica Paves kazetaria, eldia.es-en argitaratutako El viaje temporal de las perseidas lanarengatik, prentsa digitala kategorian.

Aurtengo epaimahaia osatu dute: Lorenzo Diaz Garcia-Campoy kazetariak, Maria Casado Telebistako Akademiako presidenteak, Miguel Angel Noceda FAPEko presidenteak, Luis del Olmo Irratiko Akademiako ohorezko presidenteak, Maria Blasco CNIOko zuzendariak eta Tomas Molina TV3ko meteorologia buruak.