Gaixotasun Kardiobaskularrak
EITB MARATOIA
Hemen da EITB Maratoiaren bideoklip solidarioa, Martin Urrutia, Leire Martinez eta elkarteetako ordezkariekin
EITB MEDIA
Hemendik At taldearen "Eskutitza" abestia izango da soinu-banda, eta keinu batean batzeko deia egingo dio gizarteari: gure eskuekin bihotzak osatzea. Zabalik dago BIZUMa: 33478.
Albisteak (1)
Bideoak (3)
Informazio gehiago (1)
Joan den ostiralean EITB Maratoiak kaleratutako Martin Urrutiaren eta Leire Martinezen irudien arrakastaren ondoren, jada ikusgai dugu, osorik, "Eskutitza" abestiaren bideoklip solidarioa. Bi abeslari ezagunek euren ahotsak eta eskuak elkartu dituzte lankidetza artistiko berezi batean; eta, gaixotasun kardiobaskularren elkarteetako hainbat kide ere batu zaizkie ekarpenera.
Hain zuzen ere, gaixotasun kardiobaskularrak dira 2024ko kausa; eta, hori dela eta, urriaren 25 honetan EITB Maratoiak bere kanpaina solidarioa aurkeztu du Bilbon egiten ari diren Osasun Kardiobaskularren SEC24 Kongresuan. Bizkaiko hiriburuko Euskalduna Jauregian 4.000 aditu inguru bilduko dira larunbatera arte, Espainiako Kardiologia Elkarteak (SEC) antolatuta; eta, testuinguru horretan, kongresuaren antolakuntzak eskainitako aukera aprobetxatu nahi izan du Maratoiak, bertan bere ekimen solidarioa aurkezteko. Horretarako, EITBko arduradunak eta BIOEF Berrikuntza eta Ikerketa Sanitarioko Euskal Fundazioko ordezkariak izan dira Euskaldunan, eta adituek eta profesionalek aukera izan dute EITB Maratoiaren lana ezagutzeko, bi alorretan: sentsibilizazioan eta ikerketarako diru-bilketan. Horrez gain, Eskutitza bideoklip solidarioa osotasunean eskaini da, Hemendik At taldearen kanta ezagunak jarriko baitio soinu banda aurtengo edizioari. EITB Maratoiak bezala, 25 urte betetzen ditu aurten abesti horrek.
Gehitu zure bhiotza eta parte hartu
Aurtengoa, beraz, urte berezia da EITB Maratoiarentzat, mende laurdena egingo baitu gaixotasunen aurkako borrokan laguntzen. Eta hori guztia, bihotzetik, edizio seinalatu honetan elementu nagusi izango den bihotz handi horretatik. Entzun bihotzari leloa izango du, eta prebentzioan jarri nahi du arreta: Gelditzea; nork bere buruari begiratzea; eta entzutea… Gure bihotzari entzutea. Gainera, keinu batean batzeko deia egingo die EITB Maratoiak herritarrei: gure eskuekin bihotzak osatzea. Hala, oraingoan ere erronka bota digu: "Eskutitza" doinua abestu, dantzatu… eta gure eskuekin bihotz bat osatzea. EITB Maratoiaren webgunean eskuragarri dago karaoke bertsioa, bideoak grabatu eta, eskuekin bihotza osatuta, bideoak bidali ahal izateko. Elkartasun, batasun eta babes keinua izango da. Gure bihotzari entzuteko deia, beraz, bikoitza: nork bere buruari entzutea, prebentzioa bilatuz; eta gure bihotzei modu kolektiboan entzutea, guztion arteko elkartasuna bultzatzeko.
25 urte taupadaka
Transplanteak, adimen desgaitasuna, garuneko kalteak, gaixotasun arraroak, minbizia, biriketako minbizia, bularrekoa, haur minbizia, iktusa, gaitz neurodegeneratiboak, buruko gaixotasunak, COVIDa, alzheimerra, esklerosi anizkoitza… EITB Maratoiak mende laurdena darama arrazoi batengatik taupadaka: ELKARTASUNA. 2023an markak hautsi zituen parte-hartzean, elkartasunean eta diru-bilketan: 1.230.000 euro baino gehiago minbizia ikertzeko. Urte guzti hauetan, gainera, hiru aldiz gainditu da milioi bat euroko langa, eta gizartearen elkartasunari esker, aurreko 23 edizioetan, 8,56 milioi euro bideratu ahal izan dira 127 ikerketa-proiektutara. Ibilbide ikusgarri horri begira, aurtengoa edizio berezia izango da, lortutako guztia ospatzeko eta eskertzeko.
Gehitu zure bihotza eta parte hartu
