Haurren minbizia izango da aurtengo EiTB Maratoiaren ardatza

Ostiral honetan, otsailaren 15ean, Haur-Minbiziaren Nazioarteko Eguna ospatzen ari da. Euskal gizartea gaitz honen inguruan sentsibilizatzeko, eta diagnostiko eta tratamendu egokia lortzeko ikerketa bultzatzeko asmoz, EiTB Taldearen aurtengo elkartasun maratoiak haur-minbizia izango du ardatz.

EiTBko hedabideek (telebista, irratia eta Internet) haur-minbiziaren inguruko informazioa zabalduko dute urte osoan, eta abenduaren 10an izango da EiTB Maratoiaren elkartasun egun handia. Informazio-zerbitzuek eta programa ugarik erreportajeak eskainiko dituzte gaixoen, senideen, medikuen eta profesionalen lekukoak bilduz, eta ekimen bereziak izango dira gaiaren inguruan.

Ikerketarako dirua biltzea izango da kanpainaren xedea. Euskal gizartearen eskuzabaltasuna eta konpromisoa funtsezkoak izango dira martxan dauden ikerketak bultzatzeko. Urtero legez, BIOEF Berrikuntza eta Ikerkuntza Sanitariorako Euskal Fundazioak kudeatuko du EiTB Maratoian bildutako dirua.