Sonyk isuna jaso du Play Stationeko datuak lapurtu zituztelako

Sony teknologia konpainiak 125.000 librako (148.000 euro) isuna jaso du Britainia Handian 2011ko apirilean izandako segurtasun akatsa dela eta. Akats horren ondorioz milioika erabiltzaileren datuak lapurtu zituen 'hacker' batek.

ICO Britainia handian informaziorako eta pribatutasunerako eskubidea bermatzen duen erakundeak eman du isunaren berri.

Sonyk aitortu egin zuen 'hacer' baten erasoa jasan zuela, eta 77 milioi erabiltzaileren datuak (izen-abizenak, helbideak, jaiotze-datak eta pasahitzak) lapurtu zituela.

Play Station Networken erabiltzaileei eragin zien erasoak. PlayStation 3ren, PlayStation Portableren eta PlayStation Vitaren bitartez online jolastea ahalbidetzen duen plataforma da hori.

ICOk jakinarazi duenez, lapurreta horretan kreditu txartelen datuak ere bazeuden.

Hori dela eta, ICOren arabera, kasua "inoiz gertatutako larrienetako bat da" eta Sonyk huts egin zuen segurtasun neurrietan, eta "lehentasuna" izan beharko litzateke enpresarentzat bankuko datuen segurtasuna.

Izan ere, ikerketak ondorioztatu du Sony dela gertatutakoaren arduraduna, arazoa saihestu baitzitekeen "softwarea gaurkotuz gero".