Olentzerori gutuna, sakelako telefonoaren bidez

Olentzerok ere teknologia berriei heldu die. Euskal ikazkinak sakelako telefonoentzako aplikazioa estreinatu du, eta, horri esker, etxeko txikienek, eta ez hain txikiek, oparien zerrenda zuzenean bidaltzeko aukera dute orain.

Dagoeneko zahar geratzen ari da arkatza hartu ,Olentzerori eskutitza paperean idaztea, zigilua erosi eta etxetik gertuen dagoen buzoiraino joatea.

Aplikazioak "Olentzerori Gutuna" izena du eta oparien zerrenda idazteko eta bidaltzeko aukera ematen du.

Hala ere, eta ezer egiten hasi baino lehen, "urte osoan ondo portatu garen ala ez aztertuko du", lanean zein ikastolan. Ondoren, gutuna idatzi ahal izango dugu, izen-abizenak eta bost opariren zerrenda jarrita.

Olentzeroren kanta

Gutuna idazteaz gain, aplikazioak Olentzeroren kanta dakar, eta jatorrizko musikarekin abesteko aukera.

Aplikazioa Android telefonoetan erabili daiteke, Google Play dendan doan lortuta.