Sortuk bigarren ponentzia aurkeztu du eta ildo politikoak zehaztu ditu

Sorturen ponentzia konstituziogileak "bide demokratiko eta politikoen" aldeko defentsa berretsi du, baina "Estatuen indarkeria estrukturalaren aurrean, gizarte desobedientziaren" alde egin dute.

Pernando Barrena, Maribi Ugarteburu eta Joseba Alvarez ezker abertzalearen bozeramaileek aurkeztu dute ponentzia konstituziogilearen bigarren zatia Donostian, eta bertan, alderdiaren ildo politikoak zehazten dira.

Bigarren zati hau "Sorturen eratze prozesuaren mamia da", Barrenak adierazi duenez, eta abenduaren 15ean herri batzarretan hasiko diren eztabaidekin abiatuko da.

Ezker abertzalearen "Estatuekin norgehiagoka estrategiak bertan behera uzteko aldebakarreko erabakia" nabarmendu dute eta "ETAren indarkeriaren amaieraren adierazpenarekin bete" dela gaineratu dute.

Aro hori gainditutzat jotzen du testuak, baina "Estatuek tresna ezberdinekin eginiko indarkeria estrukturalaren aurrean, defentsarako erreakzioa zilegi" dela uste du.

"Independentzia eta Euskal Herrian sozialismoa eraikitzea egun batetik bestera egin ezin den" konkista dela onartzen du, eta ildo honetan, "bide luzea" beharko dela zehaztu du alderdiak. Horretarako, "borroka politikoan, indarrekin harremanak eta korrelazioak aldatuz joan beharko dira".

EArekin, Alternatibarekin eta Aralarrekin aliantzan jarraitzearen alde egin du alderdiak, baina pauso bat gehiago emateko prest azaldu da: "Herritarren Bloke Independentista", eragile politiko, sindikal eta sozialekin batera.

"Euskal gatazkari irtenbidea" bilatzeko atalean, Aieteko Adierazpenean eta Gernikako Akordioan azaldutako antolabideak berretsi dituzte. Lehen fasea "gatazka armatuaren ondorioei" buruzkoa izango litzateke, "ETAren estruktura militarrak desegitea, presoen eta biktimen egoera aztertzea eta errepresio estrategiak bertan behera uztea" aztertuko lukete.

Halaber, bigarren fasean elkarrizketa eta negoziazio politikoa aurreikusi dituzte, "irtenbide politiko eta demokratikoen inguruko akordio bat lortzeko", "Euskal Herria nazio gisa aitortzeko eta determinazio eskubidea onartzeko asmoz".