Politika -
Baldintzapean aske
Uribetxebarria Arrasateko kaleetan barrena, alta jaso eta egun batera
Gaixo dagoen ETAko presoa bere kabuz irten zen asteartean ospitaletik, oso argal eta familia lagun zuela. Itxaroten ari zitzaion jendea besarkatu zuen.
Erredakzioa
Josu Uribetxebarria gaixo dagoen ETAko presoa (Auzitegi Nazionalak baldintzapean aske utzi zuen) Arrasateko kaleetan (Gipuzkoa) barrena paseatzera irten da, ospitalean alta jaso eta egun batera.
Uribetxebarria senide batekin batera Arrasateko Udalera (Bildu dago buru) joan da, eta horren ostean taberna batera sartu da, Atlasek hartutako irudietan ikusi daitekeenez.
Baldintzapean aske dagoen presoa (besteak beste, Jose Antonio Ortega kartzelako funtzionarioa bahitzeagatik auzipetu zuten) atzo irten zen Donostia Ospitaletik; abuztuaren 1etik egon da bertan, giltzurrunetako minbiziagatik.
Presoak osasun arrazoiengatik lortu zuen baldintzapeko askatasuna, baina debekatuta du biktimen edo horien senideen etxeetara edo lantokira hurbiltzea, baita era "aktiboan edo pasiboan" indarkeria goraipatzen den manifestazio publikoetan parte hartzea ere.
Horrez gain, presoak ezingo du baimen judizialik gabe bizileku modura finkatu duen herritik irten, eta bere tratamenduan aldaketarik izanez gero jakinarazi egin beharko du.
Arrasatera heltzerakoan, ikurrinekin eta presoen aldeko banderekin itxaroten ari ziren hainbat pertsona zeuden bere etxebizitza kanpoan. Horren ostean, ongi etorria emateko ekitaldi bat egin zioten lokal batean.
