Politika -
Manifestazioa
Epaileak Donostiako presoen aldeko martxa baimendu du
Eloy Velascok legezkotzat jo du ETAko presoei dagokien espetxe politikaren inguruko aldarrikapenak egin nahi izatea baina halere, presoen argazkirik erakutsi ez dezaten bermatuko du.
Erredakzioa
Auzitegi Nazionaleko Eloy Velasco epaileak Donostian egingo den presoen eskubideen aldeko manifestazioa baimendu du, 'Giza eskubide guztiak. Euskal presoak Euskal Herrira' lelopean burutuko dena.
Estatuko segurtasun indarrak ordea zelatan egongo dira manifestazioan presoen argazkirik erakutsi ez dadin, inongo delitu zantzurik ez egoteko eta martxa normaltasunez egin dadin.
Terrorismoaren Biktimen Elkarteak jada eskatu zion epaileari manifestazio hau debekatu zezan, ustez ETA goraipatzeko erabiliko zutelakoan martxa hau deitu dutenek.
Zigor izaerako aldarrikapenak
Velasco epaileak halere, ez du ikusten presoen aldeko martxa honek ETA goraipatzeko helbururik duenik, baizik espetxe politiken inguruko aldarrikapenak egitea, kontuan izanda Europako giza eskubideen epaitegiak Espainiari zigorra ezarri diola Parot doktrina aplikatzeagatik, besteak beste Ines del Rio presoari.
