Ugarteburu: 'Sortu epailetzaren pasilloetan bahituta dago'

Sortu "Espainiako epailetzaren pasilloetan bahituta dagoen aukera politikoa" dela esan du Maribi Ugarteburu ezker abertzaleko bozeramaileak.

Euskal politika aztertzeko Donostian eman duten prentsaurrekoan egon da Ugarteburu. Bertan, ezker abertzalea "urtebete baino gehiago Sorturen legalizazioaren" zain dagoela ekarri du gogora, eta "Alderdien Legeak exijitzen duena betetzen" duela azpimarratu du.

"Hala ere, PSOEren Gobernuak hauteskundeetan parte hartzea ekidin zuen, eta orain, PPren Gobernu berriak, bahiketa hori luzatu du", adierazi du.

Datozen hauteskundeen inguruan, ezker abertzalearen lehen lanek ez dutela izenak finkatzea bilatzen adierazi du Ugarteburuk, eta arreta programan jartzen ari direla zehaztu du, "Euskal Herriko herritarrek behar duten eskaintzan".