Politika -
Indiara bidaia ofiziala
Krisiak Indiako proiektuak ez oztopatzearen alde egin du Patxi Lopezek
Lehendakariak igande honetan amaitu du kooperazioari emandako denbora eta astelehenetik aurrera enpresa-misioari helduko dio.
Erredakzioa
Patxi Lopez lehendakariak Jaurlaritzaren eta Vicente Ferrer Fundazioaren arteko elkarlanari eustearen alde egin du, eta, krisia eta murrizketak egon arren, Indiako zenbait proiektu "ez liratekeela gelditu behar" adierazi du.
Kooperazioari dagokion bidaiaren zatiaren balantzea egiterakoan, lehendakariak azpimarratu egin du merkataritza-misio batek kooperazio proiektuak bisitatzeko denbora ematen duen lehen aldia dela. Bere ustez, Jaurlaritzak kooperazioari dirua ematea "euskal gizartearen elkartasunaren isla baino ez da".
Lehendakaria gustura agertu da "milaka kilometrora hartutako erabakiek" Indian eragina dutela ikusita eta "pertsonen bizitza duintzeko" balio dutelako. Zentzu horretan, Indiara egindako bisitak Vicente Ferrer Fundazioarekin egiten ari diren elkarlana "denboran luzatzea" ekarriko du "horrela merezi duelako". Vicente Ferrer Fundazioa
2008tik 2011ra, Patxi Lopezen Gobernuak 3,1 milioi euro eman dizkio Indiari, eta horietatik 1,7 milioi Vicente Ferrer Fundazioaren proiektuek jaso dute. Diru horien laguntza jaso duten zenbait proiekturi bisita egin die lehendakariak igandean. Patxi Lopez eta euskal delegazioa Kothapallithanda herrira joan dira. Bertan, nekazaritza ekologikoarekin lotuta dagoen proiektuan, genero indarkeriaren biktima izan diren emakumezkoen talde batekin lan egiten dute.
