Abortuaren Legearen erreformak amatasun eskubidea babesten du

Alberto Ruiz-Gallardon Justizia ministroaren hitzetan, Gobernuak abian jarritako Abortuaren Legearen erreformak "emakumearen eskubidetan nagusiena den amatasuna babestera dator".

Ruiz-Gallardonek horrela erantzun dio Kongresuan Angeles Alvarez diputatu sozialistari, Gobernuak "emakumeen eskubide sexualak eta ugalketa eskubideak murriztuko" ote zituen galdetu ostean.

Ministroak "ezetz" esan du, Gobernuaren borondatea ez delako emakumeen eskubideak murriztea beren eskubideak babestea baino, izan ere, egungo gizartean, Ruiz-Gallardonen esanetan, "askotan emakumearen aurkako oinarrizko indarkeria gertatzen da haurdunaldiaren harira".

"Emakume askok bortxatuta ikusten dute ama izateko eskubidea, beren inguruan sortzen diren zenbait egituren ondorioz", Ruiz-Gallardonen hitzetan.

"Bilatu gabeko haurdunaldi bat ematen denean" gizarteak ama egiten du gatazka edo arazo egoeren "erantzule bakarra", eta horien aurrean "legegilea ez da albo batean gelditu behar".

"Jaio ez denaren bizitza abortuaren zigorrarekin babestea ez da nahikoa, eta haurdun dagoen emakumea babestua egon behar da", gaineratu du.