Politika -
Bake plana
Ezker abertzaleak 'Euskal Herrian berretsitako akordioak' nahi ditu
"Elkarrizketa inklusibo, herrialdeko alderdi guztiekin egin behar da, behin betiko irtenbidea lotzeko", esan du Txelui Morenok.
Erredakzioa
"Gatazkaren irtenbidea ez da Madriletik hartutako prozesu batekin etorriko, denak kontutan hartzen dituen Euskal Herrian berretsitako akordio batekin baizik", esan du ezker abertzaleak.
Nafarroako Parlamentuari erantzun dio Txelui Morenok, izan ere, ETAren amaiera modu eraginkorrean eta frogagarrian lortzeko bideak abiatzeko UPNk, PSNk eta PPk sinatutako mozio bat onartu zuen atzo. Bertan, Kongresuan aurkeztutako proposamena biltzen da.
Ezker abertzalearentzat, ekimenak "irtenbide demokratiko baten beharra" onartzen du, eta Nafarroak "elkarrizketetan eta akordioetan parte hartu behar duela".
"Gatazkaren irtenbidea ez da Madriletik hartutako prozesu batekin etorriko, denak kontuan hartuta Euskal Herrian berretsitako akordio batekin baizik", esan du ezker abertzaleak.
Txelui Morenoren ustez "ETAk paper bat du, eta hori garbi dago dagoeneko", baina denen arteko elkarrizketa "herrialdeko alderdi guztien artekoa da, behin betiko irtenbide bat lortzeko, eta gertatutakoa inoiz gehiago ez errepikatzeko".
"Abiapuntua alderdi guztien arteko elkarrizketa da, baina akordioa aldez aurretik idatzita eraman gabe", adierazi du Morenok. Hortik aurrera, "gauza bakoitzak bere denbora behar du", esan du, eta solaskide guztiek "bidean gauzak utzi beharko dituzte".