Politika -
Auzitegi Nazionala
Gorka Landaburu: 'Eskuak moztu dizkidazue, baina ez mingaina'
2001. urtean etxera lehergailu bat bidali zioten ETAko bi kideren aurrean egin ditu adierazpenak Gorka Landaburu kazetariak.
Erredakzioa
Gorka Landaburu kazetariak 2001. urtean bonba-liburu bat bidali zioten ETAko bi kideei esan die "nahastu" egin zirela, eskuak moztea lortu zutelako, "baina ez mingaina". "Euskadiren askatasunaren eta bakearen alde borrokan" jarraituko duela esan du.
"Ni kazetaria naiz, eta eskuak moztu dizkidazue, ezkerreko begia itsu utzi didazue eta gorputzean hainbat orbain ditut, baina nahastu egin zarete, ez didazue mingaina kendu", adierazi du Auzitegi Nazionalean, Oskarbi Jauregi eta Patxi Xabier Macazaga Azurmendi ETAko ustezko kideen aurkako epaiketan.
Zarauzko bere etxean bonba-liburu bat jaso zuen Gorka Landaburuk 2001ko maiatzaren 14an. Paketeak ez zion susmo txarrik ekarri, Elkargiren anagrama baitzeraman.
"Dutxatik atera eta bulegora joan nintzen. Gutun-azala irekitzean, argi izan nuen: Harrapatu egin naute", adierazi du Landaburuk bere deklarazioan.
Akusatuek ez dute epaitegian deklaraziorik egin. Luis Barroso fiskalak 23 urteko kartzela zigorra eskatu du haientzat.
Ministerio Publikoaren arabera, auzipetu biak ETAko 'Buruntza' taldeko kideak ziren. Poliziak 2001ko abuztuan desegin zuen, Ertzaintzarekin batera Gipuzkoan egindako operazio batean.
