PSE-EEren hordagoa

Euskal Alderdi Sozialistak eta Patxi Lopez horren buruak hordagoa bota zuten PSOEren 38. Kongresuaren bezperatan Rubalcabaren alde apustu garbia eginez.

Sevillan gaur goizean hasi den saiora heldu baino lehen, Perez Rubalcabaren, azken hauteskundeetako hautagaiaren, garaipena ziurtzat ematen zuten askok. Azken orduotan, baina, bigarren hautagaiak, Carme Chaconek, indarra hartu du, eta Kongresuaren hasieran gauzak ez daude hain argi. Euskal sozialistek, ordea, apustuari eutsi diote eta ez dute atzera egin.

Jose Antonio Pastorrek argi esan duenez, euskal sozialisten gehiengoak Rubalcabaren aldeko hautua egingo du. Ministro eta presidenteorde ohiarekin duten gertutasun pertsonal eta ideologikoa omen da arrazoia. "Gutarra da", esan du Pastorrek. Euskal sozialisten beste goi buruzagi batzuek ere ziurtzat ematen dute Rubalcabaren garaipena. Hala ere, iritzi hori ez dute hain argi islatzen Euskadin eta Madrilen ardura duten beste ordezkari batzuek.

Gauzak horrela, ez da harritzekoa euskal sozialisten artean ardura izatea nagusi Kongresuaren lehen ordu hauetan. Izan ere, Lopezek eta alderdi osoak egin duten hordagoa ondo ateratzen ez bada, kolpea gogorra izango da eta galtzaileen aldean geratuko dira.

Agian horregatik, eta Kongresuaren bezperan Rubalcabak ondoan nahiko lukeela jakinarazi zuelako, Patxi Lopez izan da bilkura hartzen ari den Sevillako hotelean buruzagi bilatuenetakoa. Berak, halere, ez du adierazpenik egin eta alderdiko beste buruen eskutan utzi du agerraldi publikoen ardura.