Frantziako Asanblea Nazionala, euskal presoak hurbiltzearen alde

Frantziako Asanblea Nazionalak euskal presoak senideengandik gertu dauden kartzeletara hurbiltzea eskatzen duen lege proposamena onartu zuen atzo gauean.

Lege proposamena Sauver Gandolfi-Schet (UMP) diputatu korsikarrak aurkeztu zuen eta ia aho batez onartu zen, izan ere, Fronte de Gaucheko (ezker erradikala) bi diputatu izan ziren abstentzioa eman zuten bakarrak.

Jean Grenet (UMP) Baionako alkate eta diputatuak atera zuen euskal presoen hurbiltzearen gaia Asanblea Nazionaleko eztabaidan. Azaldu zuenez, ETAk jarduera armatua utzi ondoren Euskal Herriak bizi duen egoerak “bake egonkorra aurreikusten du”, eta lege proposamenak “abiatutako prozesuari lagunduko dio”.

Baionako alkateak Aurore Martinen kasua ere izan zuen hizpide: “Gure herriko Justiziak atzera bota beharko lituzke estradizio prozedura batzuk, ezin dira berriro gertatu. Aurore Martin euskal militanteaz oroitzen naiz, ez baitu odol deliturik eta duela hilabete batzuk Baionan atxilotzeko ahalegina egin zuten eta galarazi egin zen oso egoera xelebrean".