Politika -
Elkarrizketa ETB-n
Izagirrek dio ministroak 'desitxuratu' egin duela ETAren errealitatea
Donostiako alkateari ez zaio iruditzen Fernandez Diezen adierazpenek "oinarri sendoa" dutenik eta ez du uste ETA logistika arloa indartzen ari denik.
Erredakzioa
Juan Karlos Izagirre (Bildu) Donostiako alkateari ez zaio iruditzen Jorge Fernandez Diez Barne ministro espainiarraren adierazpenek "oinarri sendoa" dutenik eta, beraz, ez du uste ETA alor logistikoa indartzen ari denik. Izagirreren arabera, "horrelako adierazpenek errealitatea desitxuratzen dute".
Izagirrek errefusatu egin ditu Barne ministroaren hitzak, ETB-2ko 'Egunon Euskadi' saioan egin dioten elkarrizketa batean. ETA talde logistiko bat berregiten saiatzen ari dela esan zuen ministroak; besteak beste, Frantzian orain dela bi aste atxilotutako ETAko ustezko hiru kideei lehergaiak atzeman izana aipatu zuen Fernandez Diezek horren erakusgarri.
Baina Donostiako alkateak esan du "datu objektiboak" beste batzuk direla, "mugimendu batzuk egon direla", Gernikako Akordioa, Aieteko adierazpena, ETAk jarduera armatua utzi izana, eta "gatazkaren sektore batek eman dituen beste pauso asko".
