Politika -
Homilia
Munillak ETAko biktimen memoria 'ez lausotzeko' eskatu du
Gipuzkoako hiriburuak San Sebastian eguna, "50 urteren ondoren, terrorismoaren mehatxurik gabe" bizi duela azpimarratu du Donostiako gotzainak.
Erredakzioa
Jose Ignacio Munilla Donostiako gotzainak terrorismoaren biktimek "bakerako eta adiskidetzerako bidean leku esanguratsua" bete behar dutela adierazi du, eta euren memoria "ez lausotzeko" eskatu du.
Donostian, San Sebastian eguneko meza nagusiko homilian, egin ditu adierazpen horiek Munillak.
Gipuzkoako hiriburuak San Sebastian eguna, "50 urteren ondoren, terrorismoaren mehatxurik gabe" bizi duela azpimarratu du gotzainak, eta biktimek bakerako eta adiskidetzerako bidean "toki esanguratsuan" egon behar dutela. Biktimen presentzia deserosoa balitz, edota "euren memoria lausotzeko tentazioa" balego, "bakerako eta adiskidetzerako geure apustua zalantzan jartzeko" arrazoiak leudeke, esan du Munillak.
Krisi ekonomikoaren errealitate gordina pairatzen dutenak ere gogoan izan ditu Munillak, langabezian daudenak, besteak beste, eta enpresariei eta politikoei "inor baztertuta gelditu ez dadin konponbidea bilatu" dezatela eskatu die.
"Danborrek arrada egin dezatela Donostian, baina geure elkartasunak ozenago egin dezala arrada", esan du homiliaren amaieran Munillak.
